სახალხო დამცველი ადიგენში ადგილობრივებს ხვდება

უჩა ნანუაშვილი უკვე შეხვდა სოფელ ჭელაში მცხოვრებ მუსლიმებს. ამ წუთებში კი სოფელ მოხეში იმყოფება. მოხეში ომბუდსმენთან შეხვედრას ითხოვს ადგილობრივი მუსლიმი თემიც და ქრისტიანულიც. მუსლიმები და ქრისტიანები სოფლის ცენტრში, ცალ–ცალკე ჯგუფად არიან შეკრებილი.

როგორც "სამხრეთის კარიბჭეს" ჟურნალისტი თაკო ფეიქრიშვილი ამბობს, უჩა ნანუაშვილი ჯერ სოფლის ყოფილი მაღაზიის შენობაში 20–მდე ქრისტიანს უნდა გაესაუბროს. ადგილობრივები ითხოვენ ჟურნალისტების გარეშე ისაუბრონ, თუმცა შეხვედრა დაიწყო და ჯერ–ჯერობით შენობაში რჩებიან ჟურნალისტებიც.

ქრისტიანებთან შეხვედრის დასრულების შემდეგ, სახალხო დამცველი მოხეში მცხოვრებ მუსლიმებს შეხვდება.

შეგახსენებთ, საქართველოს სახალხო დამცველი უჩა ნანუაშვილი სამცხე–ჯავახეთს დღეს, 7 დეკემბერს ესტუმრა. ომბუდსმენის აპარატის ინფორმაციით, უჩა ნანუაშვილი ადიგენში ადგილობრივებს, ასევე, ახალციხისა და ტაო–კლარჯეთის მიტროპოლიტს თეოდორეს, სამცხე–ჯავახეთის გუბერნატორსა და ადიგენის გამგებელს შეხვდება. 8 დეკემბერს კი გამართავს საჯარო ლექციას სამცხე–ჯავახეთის სახელმწიფო უნივერსიტეტში.

[sknews.ge]