ახალციხის მესამე სომხური საჯარო სკოლის პედაგოგი როზა პეტროსიანი სასერტიფიკაციო გამოცდაზე ვერ გადის. იგი სწუხს, რომ კვალიფიკაციის ამაღლებისა და ხელფასის გაზრდის საშუალება არ ეძლევა.
- ’ეს გამოცდები სომხური სკოლის მასწავლებლებისთვის არ იყო. მგონი წელს დაიწყო პედაგოგების დატრენინგება. თუმცა მე, როგორც სომხური ენის პედაგოგი, ვერ გავალ გამოცდაზე. ჩვენთვის არ არის გამოცდები. ვერ ვხვდები რატომ, რატომ უნდა ჩამოვრჩეთ სხვა მასწავლებლებს?!’- ამბობს პეტროსიანი.
მე-3 სკოლის დირექტორის სვეტლანა არუთუნიანის თქმით, გამოცდების ჩაბარება ყველას უნდა შეეძლოს: ’მე მგონი, წელს იწყება ჩვენი სკოლის პედაგოგების დატრენინგება. გამოცდებში მონაწილეობის მიღება როდის შეეძლებათ არ ვიცი’.
ახალციხის საგანმანათლებლო რესურსცენტრში ამბობენ, რომ არაქართულენოვანი სკოლის პედაგოგებს შეუძლიათ გამოცდაზე გასვლა, მათ შეუძლიათ ქართულ ენაზე ჩააბარონ უნარ-ჩვევების გამოცდა.
- ’წინა წლებში არაქართულენოვანი სკოლის რამდენიმე პედაგოგმა ჩააბარა სასერტიფიკაციო გამოცდა. მათ აქვთ ამის უფლება, უბრალოდ ტესტები ქართულ ენაზეა და ენის ბარიერის გამო ვერ გადიოდნენ გამოცდაზე. წელს რა მდგომარეობა იქნება, ჯერ არ ვიცით. ველოდებით ინფორმაციას’, - გვითხრა რესურსცენტრის უფროსმა სპეციალისტმა დიანა ინასარიძემ.
გამოცდების ეროვნულ ცენტრში განგვიმარტეს, რომ წელს ამ კუთხით სიახლე არ არის. ტესტები არაქართულენოვანი სკოლების მშობლიურ ენებზე არ დაიბეჭდება. შეგახსენებთ, არაქართულენოვან სკოლებში ჯერ ბილინგვური სწავლება ინერგება.
რაც შეეხება ქართულენოვან სკოლებს, პედაგოგებმა გამოცდებისთვის მზადება დაიწყეს. ახალციხის პირველ საჯარო სკოლაში 69 მასწავლებლიდან 25 სერტიფიცირებულია, 14 კი წელს გადის გამოცდაზე. პირველი სკოლის დაწყებითი განათლების პედაგოგი მეგი ქიმერიძე ამბობს, რომ გამოცდები ყოველმხრივ კარგია მასწავლებლებისთვის: ’შარშან უნარ-ჩვევები ჩავაბარე, წელს კი პროფესიულზე გავდივარ’.
კერძო სკოლა ’მზექას’ დირექტორი ბელა კაპანაძე კი ფიქრობს, რომ სერტიფიცირება სავალდებულო არ უნდა იყოს. ’მზექას’ 8 სერტიფიცირებული პედაგოგი ჰყავს და 6 წელს გადის გამოცდაზე,
- ’გარკვეული მეთოდების დაზეპირება, არაფერს ნიშნავს. კარგი იქნება, თუ იარსებებს მასწავლებელთა დახელოვნების ინსტიტუტი. ეს ბევრად გაზრდის მასწავლებლებს. შეიძლება, მასწავლებელმა ვერ ჩააბაროს გამოცდა, მაგრამ არაჩვეულებრივი იყოს გაკვეთილზე’, - ამბობს იგი აქვე ამატებს, - ’მასწავლებლებს დიპლომში უწერიათ, რომ აქვთ მასწავლებლობის უფლებას. ანუ ეს ნიშნავს, რომ უნივერსიტეტის დამთავრების შემდეგ არ ჰქონდა მასწავლებლობის უფლება?!’
სასერტიფიკაციო გამოცდებისთვის რეგისტრაცია 11 თებერვალს დაიწყო და 28 თებერვალს დასრულდება.
პედაგოგთა სასერტიფიკაციო გამოცდა პირველად 2010 წლის ზაფხულში ჩატარდა.პირველ ეტაპზე სასერტიფიკაციო გამოცდებში მონაწილეობის საშუალება ჰქონდათ: მატემატიკის, ქართულისა და უცხოური ენების პედაგოგებს სურვილისამებრ. 2011 წელს ჩამონათვალს დაემატა შემდეგი საგნები: ისტორია, გეოგრაფია, სამოქალაქო განათლება, ბიოლოგია, ფიზიკა, ქიმია და დაწყებითი კლასები. 2012 წელს კი: ხელოვნება, მუსიკა, ფიზიკური აღზრდა და მულტილინგვური განათლება. ყოველ წელს, პედაგოგები საგნობრივი გამოცდის გარდა პროფესიულ უნარებსაც აბარებენ.
სერტიფიცირების შედეგად პედაგოგის ხელფასი 75 ლარით იზრდება. კომპიუტერისა და ინგლისურის გამოცდის ჩაბარების შემთხვევაში მათ კიდევ 200 ლარი ემატებათ, საუკეთესო 25%-ში მოხვედრილი მასწავლებლის ხელფასი კი 1000 ლარია. სასერტიფიკაციო გამოცდა 2015 წლამდე ნებაყოფლობითია.
[ნინო ზედგინიძე, ახალციხე]