ახალციხის სოფლებში ცენტრალურ გზებზე სათვალთვალო კამერები დამონტაჟდება

2017 წლის ბიუჯეტში სათვალთვალო კამერების შესაძენად ადგილობრივმა თვითმმართველობამ 35 000 ლარი გაითვალიწინა. გამგებლის ზაზა მელიქიძის განმარტებით, საკრებულოს გადაწყვეტილება მნიშვნელოვანია მოქალაქეების უსაფრთხო გადაადგილებისთვის.

„ჩვენს სოფლებში, სკოლები და საბავშვო ბაღები განთავსებულია ცენტრალური მაგისტრალის მიმდებარედ. მიუხედავად იმისა, რომ გზებზე საგზაო ნიშნები განთავსებულია, მძღოლები მაინც არღვევენ მოძრაობის წესებს და სწრაფად მოძრაობენ“, – განაცხადა ზაზა მელიქიძემ.

მისივე თქმით, რომელ მონაკვეთზე განთავსდება სათვალთვალო კამერები, ჯერ გადაწყვეტილი არ არის, თუმცა ერთ–ერთი მიმართულება, სადაც კამერა დაიდგმება, ქალაქი ვალეა.

„ვალეში გზები უფრო დატვირთულია. საბაჟოსკენ ბევრი ტრაილერი მოძრაობს, ხშირად გადაჭარბებული სიჩქარით და იყო რამდენიმე ავტოსაგზაო შემთხვევაც. ჩვენ დავამონტაჟებთ კამერებს, მოვლა –პატრონობა და დარღვევების აღრიცხვა კი საპატრულო პოლიციის მოვალეობა იქნება. შესაბამის ორგანოებთან მოლაპარაკებებს ვაწარმოებთ “, – განაცხადა ზაზა მელიქიძემ.

[sknews.ge]