ადგილობრივები რუსული ბაზრის გახსნის შესახებ [Video]

საქართველოს პრემიერ-მინისტრმა ბიძინა ივანიშვილმა გუშინ, 5 თებერვალს გამართულ პრეს-კონფერენციაზე განაცხადა, რომ ქართული პროდუქცია რუსულ ბაზარზე ბრუნდება: ”ქართული პროდუქცია დაბრუნდა რუსულ ბაზარზე. პირველ ეტაპზე ღვინო და შემდეგ, უკვე სხვა დანარჩენი”.

აგრარული მიმართულების სამცხე-ჯავახეთში ეს განცხადება არავის გამოპარვია. მითუემეტს, მას შემდეგ, რაც გასულ წლებში არაერთი შემთხვევა იყო, როცა მოსახლოებას ტონობით მოსავალი გაუფუჭდა. ათეულობით ტონა კომბოსტო სარდაფებში დაულპათ 2011 და 2012 წელს ვალეში მცხოვრებლებს. გასაღების ბაზრის არარსებობისა და მოსავლის სარდაფში გაფუჭების გამო ეფექტური რეალიზების წინადადებები შეიმუშვეს და საქმეში სახელმწიფოს ჩართვას ითხოვენ ახალქალაქში მცხოვრებლებიც.

- ”მოსახლეობის დიდი ნაწილი თავს იმით ვირჩენდით, რომ ჩვენს პროდუქტს რუსეთში ვყიდდით, ახლა ძალიან გაგვიჭირდა ამიტომ მიწებსაც ვეღარ ვამუშავებთ. თუ შეგვეძლება ისევ გავიტანოთ რუსეთში ჩვენი პროდუქტი, ჩვენთვისაც კარგი ინება და სახელმწიფოსთვისაც”, - ამბობს ადიგენის მუნიციპალიტეტის სოფელ უდეში მცხოვრები ავთო ბალახაშვილი.



მესხეთში მცხოვრებთა უმრავლესობა მოწეულ პროდუქტს ახლა ძირითადად ახალციხის ”ალფა მარკეტში”, კილოგრამობით ყიდის. გლეხები ამბობენ, რომ ტონობით მოსავლის ასე გასაღება ძალიან რთულია, უბრალოდ მათ სხვა გზა არ აქვთ. ამიტომ, რუსული ბაზრის გახსნა მათთვის იმედისმომცემია.

- ”დაბალი ფასებია, არც არავინ იბარებს, ამიტომ გვიწევს გაყიდვა ბაზარში. სამწუხაროდ, მყიდველიც არაა ბევრი და პროდუქტი გვიფუჭდება”, - გვეუბნება ახალციხის მუნიციპალიტეტის სოფელ სხვილისის მკვიდრი მაქაღ მაქაღიანი.

[ნუკა სტეფნაძე, ახალციხე]