ყულალისელ მოსწავლეებს ავტობუსი არც დღეს მოემსახურა

გუშინ 17 ოქტომბერს, ყულალისელმა მოსწავლეებს "ერთიანი ნაციონალური მოძრაობის" დეპუტატობის კანდიდატი, ვაჟა ჩიტაშვილი დაპირდა, რომ თუკი სასკოლო ავტობუსი მათ დღეს არ მიაკითხავდა, ბავშვების ტრანსპორტირებას საკუთარი მანქანით თავად უზრუნველყოფდა.

"მე მაქვს ამის რელური სურვილი და შესაძლებლობაც, რომ ეს ბავშვები მე ვატარო და დარჩეს სამარცხვინო ლაქად ადგილობრივი ხელისუფლებისა თუ განათლების სისტემის. მაგრამ ახლა წინასაარჩევნო პერიოდია და არ მინდა კანონთან წინააღმდეგობაში მოვიდე. ამიტომ ამ საქმეზე დავიწყებ მე მუშაობასა და ფიქრს“, – აცხადებს ვაჟა ჩიტაშვილი.

17 ოქტომბერს მოსწავლეებმა კიდევ ერთი დაპირება ყულალისში გამგებლის წარმომადგენლისგან, კარლენ კარახანიანისგან მიიღეს, რომელმაც განმარტა, რომ სასკოლო ავტობუსი მწყობრიდან იყო გამოსული და როგორც კი შეკეთდებოდა ის მოსწავლეებს კვლავ მოემსახურებოდა.
მიუხედავად დაპირებებისა, დღეს, 18 ოქტომბერს, მოსწავლეებმა ყულალისიდან პამაჯამდე დაახლოებით 2 კილომეტრიანი გზა კვლავ ფეხით გაიარეს.

როგორც ყულალისში მცხოვრები მოსწავლეების მშობლები განმარტავენ, სასკოლო ავტობუსი მათ შვილებს ბოლო სამი წლის განმავლობაში ემსახურებოდა, თუმცა გუშინ, 17 ოქტომბერს მოსწავლეების წამოსაყვანად ყულალისში ტრანსპორტი აღარ მივიდა. ადგილობრივების ნაწილი ამ ფაქტს იმით ხსნის, რომ 8 ოქტომბრის საპარლამენტო არჩევნებზე ყულალისში მცხოვრები მოსახლეობის უმრავლესობამ ხმა "ერთიან ნაციონალურ მოძრაობას“ მისცა.

“სამხრეთის კარიბჭე“ ამ თემის დეტალებს იკვლევს. თვალი ადევნეთ ვებგვერდს.

[თაკო ფეიქრიშვილი, ახალციხე]