ენმ-ს ბრალდებები ახალციხის საოლქო კომისიის თავმჯდომარის მისამართით

„ნაციონალური მოძრაობის“ წევრმა ირაკლი ბარძიმაძემ, რომელიც ახალციხის საოლქო კომისიის წევრია, დღეს, 6 ოქტომბერს, ჟურნალისტებთან ბრიფინგი გამართა და თავმჯდომარე თეა გავაშელი კომისიის სხვა წევრებზე გავლენის მოხდენაში დაადანაშაულა.

„სახელისუფლებო თუ ოპოზიციური პარტიები გადაწყვეტილებებს თეა გავაშელის მინიშნებით ღებულობენ. თეა გავაშელი რომ აწევს ხელს, ყველა პარტიამ უნდა აწიოს“, -ამბობს ბარძიმაძე და ამატებს, რომ ზეწოლა გავაშელზეც სავარაუდოდ უშიშრობის მხრიდან ხორციელდება.
ზეგავლენის მცდელობის მაგალითად ბარძიმაძე კომისიის წევრების შერჩევის სხდომას ასახელებს, რომელზეც მისი თქმით, უშიშროების თანამშრომელმა გავაშელს მისცა მითითებები, წევრებად ვინ უნდა შერჩეულიყვნენ.

„მანამ წევრები აირჩეოდნენ, წინასწარ დაურიგდათ ფურცლები, რომელზეც მონიშნული იყო წერტილებით კომისიებში ასარჩევი ხალხი. შუა შეხვედრაზე თეა გარეთ გავიდა, კი თქვა, რომ ცუდად ვარო, მაგრამ იქ სავარაუდოდ სუსის თანამშრომელი იყო და მითითებები მისცა“, - განმარტავს „ნაციონალური მოძრაობის“ წევრი ირაკლი ბარძიმაძე.

ბარძიმაძე საოლქო კომისიის წევრებს აქტიურობას უწუნებს და ამბობს, რომ ამ ხნის განმავლობაში არცერთ კვალიფიციურ პარტიას, რომელიც კომისიის წევრია თავმჯდომარისათვის საჩივრით არ მიუმართავთ.

„სულ არ იგრძნობა, რომ აქ რომელიმე პარტია ობიექტური არჩევნების ჩატარებაზე ზრუნავს. ფაქტობრივად, 12 წარმომადგენელი ერთის წინააღმდეგაა“, - ამბობს ბარძიმაძე.

„ნაციონალური მოძრაობიდან“ N37-ე ახალციხის საარჩევნო ოლქის კომისიის წევრის ბრალდებებზე კომენტარის გაკეთება არ სურს თავმჯდომარეს თეა გავაშელს: „ყველა კომისიის წევრი ზრდასრულია და გადაწყვეტილებებსაც თვითონ იღებს. ბარძიმაძემ რაც უნდა ის თქვას, თავისი ნებაა, მე სხვა კომენტარის გაკეთება არ შემიძლია“.

მიუხედავად ამ მძიმე ბრალდებებისა, „ნაციონალურმა მოძრაობამ“ ბრიფინგი ისე დაასრულა, არც რაიმე კონკრეტული დოკუმენტი გაუსაჯაროებია და არც სუს–ის თანამშრომლების ვინაობა გაუმხელია.

რაც შეეხება, საუბნო კომისიების წევრების შერჩევის პროცესს, შეგახსენებთ, ამ თემაზე „სამხრეთის კარიბჭე“ ადრეც წერდა.

[ლუბა გიორგაძე, ახალციხე]