ნინოწმინდა–ახალქალაქის მაჟორიტარობის კანდიდატები ოლქებში არსებულ პრობლემებზე

„ნაციონალური მოძრაობის“ კანდიდატის არსენ კარაპეტიანის თქმით, უმუშევრობა პირველი და ყველაზე მნიშვნელოვანი პრობლემაა, რის მოგვარებაზეც პარლამენტში შესვლის შემთხვევაში იზრუნებს. პრობლემის გადაჭრას იგი მეწარმეებისათვის გადსახადების შემცირებით გეგმავს. კარაპეტიანი ერთ-ერთ მნიშვნელოვან პრობლემად კრიმინალის ზრდასაც მიიჩნევს: „ქვეყნის ეკონომიკა დამოკიდებულია უსაფრთხოებაზე. როცა ძალოვან სტრუქტურაში არიან უნიჭო ადამიანები, მაშინ გაჩერებულია ქვეყანა“.

დეპუტატობის კანდიდატად არჩევის შემთხვევაში, პრიორიტეტული იქნება სოციალური სფერო და ჯანდაცვა ბლოკის „პაატა ბურჭულაძე-სახელმწიფო ხალხისთვის“ კანდიდატისთვის შაქრო აივაზიანისთვის.

სოციალურ-ეკონომიკურ საკითხებზე მუშაობას გეგმავს დეპუტატობის დამოუკიდებელი კანდიდატი არტაშეს ფალანჯიანი: „რეალურად, აქ დიდი პროექტები არ ხორციელდება. ვეცდები ეს საკითხი ყველა დონემდე მივიტანო“.

კიდევ ერთი დამოუკიდებელი კანდიდატი რობერტ ჯაღასპანიანცი, ყველაზე დიდ პრობლემად საგზაო ინფრასტრუქტურასა და სოფლებში ამბულატორიების არარსებობას მიიჩნევს. პარლამენტში გასვლის შემთხვევაში, იგი სწორდ ჯანდაცვაში არსებულ პრობლემებს წამოწევს.

სარწყავი სისტემის არარსებობას ყველაზე დიდ პრობლემად მიიჩნევს „ეროვნული ფორუმის“ კანდიდატი არმენაკ ფოლორჩიანი და ამბობს, რომ დეპუტატის მანდატის მოპოვების შემდეგ, იგი სწორედ ახალი სისტემის მშენებლობას დაიწყებს. გარდა ამისა, იგი ყველა სოფელში, ახალი ამბულატორიების მშენებლობას გეგმავს.

ახალქალაქი-ნინოწმინდაში სასმელი წყლის პრობლემებს ასახელებს „რესპუბლიკელების“ დეპუტატობის კანდიდატი აშოტ საარიანი. მისი თქმით, გარდა ინფრასტრუქტურული პრობლემებისა, ადგულობრივებს პრობლემები ექმნებათ საბაჟო გამშვებ პუნქტებზე, საზღვრის გადალახვისას. იგი ფიქრობს, რომ აღნიშნულის შესახებ კანონში ცვლილებებია შესატანიდა პარლამენტში შესვლის შემთხვევაში, ამ კუთხით აპირებს მუშაობას.

მერუჟან კარახანიანი ამბობს, რომ მის ოლქში ყველაზე მწვავე გლეხების მდგომარეობაა და სახელმწიფომ მათ ყურადღება უნდა მიაქციოს.

სამ მთავარ პრობლემას, მიწის რეგისტრაციას, გზებსა და გაზიფიცირებას ასახელებს ახალქალაქი-ნინოწმინდაში „ქართული ოცნების“ დეპუტატობის კანდიდატი ენზელ მკოიანი. მისი თქმით, ახალქალაქი-ნინოწმინდაში მოსახლეობის 30% ბუნებრივი აირი საერთოდ არ აქვს, ასევ მოსაწესრიგებელია მიწის რეგისტრაციის საკითხიც. იგი პარლამენტში შესვლის შემთხვევაში სწორედ ამ პრობლემების მოგვარებას გეგმავს.

[ვარლამ წიკლაური, ახალქალაქი]