ადიგენელი აბიტურიენტების პრიორიტეტები

ადიგენის მუნიციპალიტეტის საჯარო სკოლების აბიტურიენტები ეროვნული გამოცდებისთვის ემზადებიან. მათ უმეტესობას თბილისის სახელმწიფო სასწავლო უნივერსიტეტებში სურს ჩაბარება. ამბობენ, რომ თბილისის უნივერსიტეტებს მეტი პრივილეგიები გააჩნიათ და უფრო დიდი შანსი აქვთ დასაქმების.

- ”ჩაბარებას ვაპირებ ილიას სახელმწიფო სასწავლო უნივერსიტეტში, მიმაჩნია, რომ თუ მანდ ვისწავლი უფრო მეტი შანსი მექნება დასაქმების. რადგან ამ უნივერსიტეტს კარგი ავტორიტეტი აქვს სხვებთან შედარებით. ჩემი სურვილია პოლიტოლოგიაზე ჩავაბარო, რადგან ესეც საკმაოდ დასაქმებადი პროფესიაა”, - ამბობს ადიგენის საჯარო სკოლის მე-12 კლასის მოსწავლე ლაშა გოგრიჭიანი.

ამავე სკოლის მე-12 კლასის მოსწავლის გიორგი ჯანელძის თქმით, მისი სურვილიც ილიას უნივერსიტეტში სწავლაა. მისი თქმით, ჯერ კიდევ გაზეთის გამოსვლას ელოდება, სადაც უნივერსიტეტების ჩამონათვალია.

- ”გაზეთი რომ გამოვა, ზუსტად გადავწყვეტ სად ჩავაბარო, სურვილი კი მაქვს ილიას უნივერსიტეტში ვისწავლო. თუმცა, ახლავე ვიცი, რომ 14 უფასო სპეციალობიდან ჩავაბარებ რომელიმეზე”, - ამბობს მეთორმეტე კლასის მოსწავლე გიორგი ჯანელიძე.

აბიტურიენტების გარკვეულ ნაწილს სამცხე-ჯავახეთის სახელმწიფო სასწავლო უნივერსუტეტში სურს ჩაბარება, რადგან ტერიტორიულად ეს სასწავლებელი უფრო ახლოსაა.

- ”დიდი სურვილი მაქვს ჩავაბარო ქართულ ფილოლოგიაზე. ჯერ გადაწყვეტილი არ მაქვს ზუსტად რომელ უნივერსიტეტში ჩავაბარებ, მგრამ მირჩევნია ჩემს რეგიონში ვისწავლო. ალბათ სამცხე-ჯავახეთის სახელმწიო სასწავლო უნივერსიტეტს მივანიჭებ უპირატესობას”, -ამბობს ლელოვანის საჯარო სკოლის მე-12 კლასის მოსწავლე შორენა პაქსაძე.

სამცხე-ჯავახეთის სახელმწიფო სასწავლო უნივერსიტეტის წარმომადგენლები ადიგენის რაიონების საჯარო სკოლების პედაგოგებს, სკოლის დირექტორებს და აბიტურიენტებს ადიგენის საჯარო სკოლაში შეხვდნენ. ფაკულტეტების დეკანატების წარმომადგენლებმა აბიტურიენტებს ფაკულტეტებზე არსებული სიახლეები გააცნეს. შეხვედრა კითხვა-პასუხის რეჟიმში მიმდინარეობდა. ასეთივე სახის შეხვედრას უნივერსიტეტის წარმომადგენლები 4 თებერვალს ასპინძის საჯარო სკოლებში გეგმავენ.

[ნუკა სტეფნაძე, ადიგენი]