გამოკითხვა: იცნობთ თუ არა ახალციხე–ადიგენის მაჟორიტარობის კანდიდატებს [Photo/Video]
მთავარი → სიახლე, პოლიტიკა, არჩევნები, SK TV, დღის კითხვა22.09.2016არჩევნებამდე 17 დღით ადრე, „სამხრეთის კარიბჭე“ დაინტერესდა, იცნობენ თუ არა მაჟორიტარობის კანდიდატებს ამომრჩევლები და სოფელ აწყურსა და ქალაქ ვალეში მცხოვრები მოქალაქეები გამოკითხა.
გამოკითხვებიდან ჩანს, რომ ახალციხე-ადიგენის ოლქში წარდგენილი დეპუტატობის ათი კანდიდატიდან მოსახლეობის უმეტესობა მხოლოდ ორ მათგანს, „ქართული ოცნების“ კანდიდატს, გიორგი კოპაძესა და „ერთიანი ნაციონალური მოძრაობის“ კანდიდატს, ვაჟა ჩიტაშვილს იცნობს.
შეგახსენებთ, ახალციხე-ადიგენის N45–ე მაჟორიტარულ ოლქში, კანდიდატები არიან:
N1 საარჩევნო ბლოკი „პაატა ბურჭულაძე – მოძრაობა სახელმწიფო ხალხისთვის“ – კობა გორგოძე; N3 "გაერთიანებული დემოკრატიული მოძრაობა" – ბესიკ ხითარიშვილი; N5 „ერთიანი ნაციონალური მოძრაობა“ – ვაჟა ჩიტაშვილი; N7 „თამაზ მეჭიაური – ერთიანი საქართველოსთვის“ – გოდერძი კუბლაშვილი; N8 საარჩევნო ბლოკი „დავით თარხან–მოურავი, ირმა ინაშვილი, საქართველოს პატრიოტთა ალიანსი" –ნიკოლოზ ინასარიძე; N19 საარჩევნო ბლოკი „თოფაძე ‐ მრეწველები, ჩვენი სამშობლო” – ტარიელ ხაჩიძე; N23 საარჩევნო ბლოკი „ჩვენები სახალხო პარტია“ – ზურაბ პაქსაძე; N27 ირაკლი ალასანია – თავისუფალი დემოკრატები – შალვა გოგოლაძე; N41 „ქართული ოცნება – დემოკრატიული საქართველო“ – გიორგი კოპაძე; N42 საინიციატივო ჯგუფი - გოჩა ათოშვილი, თამაზ ბარბლიშვილი, ავთანდილ მამუკაშვილი, რევაზ გოგოლაძე, რომანი მაისურაძე – ნუგზარ პარუნაშვილი
90-იან წლებში ქალაქ ახალციხის საქალაქო საკრებულოს წევრი, ბოლო ორი წლის განმავლობაში კი ქალაქის მერი იყო „ქართული ოცნების“ კანდიდატი გიორგი კოპაძე.
ვაჟა ჩიტაშვილი 2012 წელს არჩეული, მერვე მოწვევის პარლამენტარია, რომელიც მანამდე სამცხე-ჯავახეთის საოლქო პროკურატურაში სხვადასხვა პოზიციაზე მუშაობდა. იყო ახალციხის გამგებელიც.
ბოლო პერიოდში, ადიგენში, არასამთავრობო ორგანზაცია „საზოგადოებრივ დარბაზს“ ხელმძღვანელობდა კანდიდატი პარტიიდან „თამაზ მეჭიაური -ერთიანი საქართველოსათვის“ – გოდერძი კუბლაშვილი.
რამდენიმე თვის განმავლობაში ახალციხის გამგებლის პოსტი ეკავა „გაერთიანებული დემოკრატიული მოძრაობის“ კანდიდატს ბესიკ ხითარიშვილს.
2014 წლიდან საკრებულოს წევრია „თავისუფალი დემოკრატების“ კანდიდატი შალვა გოგოლაძე (რომელმაც იურიდიული კომისიიდან პარტიული ნიშნით გადაყენების გამო ქალაქის საკრებულოს სასამართლო მოუგო).
ცენტრალურ უწყებაში წამყვანი პოზიცია ეკავა „სახელმწიფო ხალხისთვის“ ახალციხე-ადიგენის კანდიდატს კობა გორგოძეს. იგი დევნილთა სამინისტროში, დევნილთა საკითხების დეპარტამენტის უფროსის პოზიციაზე მუშაობდა.
ბოლო წლებში, სხვასხვა პოზიციაზე, საქართველოს პარლამენტში მუშაობდა „პატრიოტთა ალინსის“ დეპუტატობის კანდიდატი ნიკოლოზ ინასარიძე. იგი ალიანსს მაჟორიტარობის კანდიდატად დასახელებისას შეუერთდა.
2012 წლის საპარლამენტო არჩევნებში „ქართული ოცნების“ ახალციხის შტაბის წევრი იყო „თოფაძე მრეწველები -ჩვენი სამშობლოს“ კანდიდატი ტარიელ ხაჩიძე.
წლების განმავლობაში საქართველოს თავდაცვის სამინისტროში სხვადსხვა პოზიციაზე მუშაობდა ახალციხე-ადიგენის ოლქში „ჩვენები-სახალხო პარტიის“ კანდიდატი ზურაბ პაქსაძე. ამავე პარტიიდან 2014 წლის არჩევნებზე თბილისის საკრებულოს წევრად იყრიდა კენჭს, თუმცა წარმომადგენლობითი ორგანოს მანდატი ვერ მოიპოვა.
დამოუკიდებელი კანდიდატი ნუგზარ პარუნაშვილი კი ჯერ სამცხე-ჯავახეთის გუბერნატორის მოადგილე, შემდეგ გუბერნატორი, 2004-08 წელებში კი პარლამენტის წევრი იყო.