ნინოწმინდაში, საცხოვრებელ სახლში, ბუნებრივი აირი აფეთქდა

შემთხვევა დღეს, 3 სექტემბერს, შუადღეს მოხდა. ბუნებრივი აირი ადგილობრივი შოთა ბდოიანის სახლში აფეთქდა. ხანძრის შედეგად ბდოიანმა დამწვრობა მიიღო და იგი ნინოწმინდის რაიონულ საავადმყოფოში გადაიყვანეს.

როგორც საავადმყოფოს მორიგე ექიმმა, არმენ დურგარიანმა, ნინოწმინდის რადიო „ნორის“ ჟურნალისტს უთხრა, 58 წლის შოთა ბადოიანს მეორე ხარისხის დამწვრობა აქვს, მისი მდგომარეობა სტაბილურია.

რადიო „ნორის“ ინფორმაციით, ხანძრის შედეგად დამწვარია სახლის ნაწილი.

როგორც გამოცემა წერს, აფეთქება ოჯახის მეპატრონის ქცევამ გამოიწვია: „შოთა ბდოიანი ყავას ადუღებდა, გაზქურაზე მდგომი მადუღარა დაავიწყდა, ყავა გადმოვიდა და ცეცხლის ალი ჩააქრო, რის შედეგადაც სახლში ბუნებრივი აირი ჟონავდა. გაზქურის განმეორებით ანთების მცდელობისას კი აფეთქება მოხდა“.









რადიო "ნორის" ფოტომასალა.

[sknews.ge]