ცესკოს საარჩევნო სკოლის კურსდამთავრებულებს სერტიფიკატები გადაეცათ

ახალციხის საარჩევნო განვითარების სკოლაში ორკვირიანი გადამზადება 18-24 წლის 25–მა ახალგაზრდამ გაიარა.

„ცესკოს“ თავმჯდომარის მოადგილე გიორგი შარაბიძე ამბობს, რომ ამ პროექტის მიზანი არ არის გადამზადებული ახალგაზრდების საარჩევნო ადმინისტრაციებში დასაქმება.

„ჩვენ ყველა ჩართულ მხარეს ვეუბნებით, რომ ეს სკოლები გაიარა ამდენმა ახალგაზრდამ, ამდენი რესურსი გაჩნდა, მოდით, ყველამ მივცეთ ამ ახალგაზრდებს შანსი, რომ ზოგი მათგანი იყოს დამკვირვებელი, ზოგი პოლიტიკური პარტიის წარმომადგენელი, ზოგი საუბნო საარჩევნო კომისიის წევრი“, – ამბობს „ცესკოს“ თავმჯდომარის მოადგილე გიორგი შარაბიძე.

სასწავლო კურსი, რომელიც 18-24 წლის ახალგაზრდებისთვის არის განკუთვნილი, საქართველოს 20 მუნიციპალიტეტში 25 ივლისს დაიწყო და მასში მონაწილეობა 453-მა ახალგაზრდამ მიიღო.

სწავლების მონაწილეებმა 10 დღის განმავლობაში მიიღეს ცოდნა ისეთ მნიშვნელოვან საკითხებზე, როგორებიცაა: საარჩევნო სისტემები, საარჩევნო ადმინისტრაცია, დემოკრატიული საარჩევნო პრინციპები, არჩევითი ორგანოები საქართველოში, არჩევნებში ჩართული მხარეები, არჩევნების გამჭვირვალობა და ხელმისაწვდომობა, გენდერული თანასწორობა და ა.შ.

სწავლება საოლქო საარჩევნო კომისიების წევრებმა და საარჩევნო ადმინისტრაციის ტრენერებმა ჩაატარეს.

„ვიმედოვნებთ, რომ გაუჩნდებათ სურვილი მონაწილეობა მიიღონ საარჩევნო ადმინისტრაციის საქმიანობაში. თუ გადაწყვეტენ და დარჩებიან ამომრჩევლებად, წარმოდგენა მაინც ექნებათ რა ხდება ადმინისტრაციაში და როგორ უნდა მისცენ ხმა“, – ამბობს ახალციხის საოლქო საარჩევნო კომისიის თავმჯდომარე თეა გავაშელი.

ცესკომ, პროექტი „საარჩევნო განვითარების სკოლა“ 2015 წელს 10 საარჩევნო ოლქში დაიწყო. ახალგაზრდების დიდი ინტერესის გამო, 2015 წელს ერთის მაგივრად სამი კურსი ჩატარდა. პროექტის წარმატებით განხორციელების შემდეგ, სკოლების რაოდენობა წელს გაორმაგდა და სწავლება 20 მუნიციპალიტეტში (გურჯაანში, სიღნაღში, თელავში, რუსთავში, გარდაბანში, მარნეულში, დუშეთში, გორში, ბორჯომში, ახალციხეში, ამბროლაურში, საჩხერეში, ზესტაფონში, ქუთაისში, ოზურგეთში, სენაკში, ზუგდიდში, ფოთში, ბათუმსა და ქობულეთში) ჩატარდა.

როგორც ცესკოში ამბობენ, ცენტრალური საარჩევნო კომისია გეგმავს, რომ პროექტი გაფართოვდეს და მოიცვას მთელი საქართველო, რაც საარჩევნო ადმინისტრაციის წარმომადგენლებს საშუალებას მისცემს, მეტ ახალგაზრდას გაუზიარონ საკუთარი პროფესიული გამოცდილება.
„საარჩევნო განვითარების სკოლა“ ევროპის საბჭოს (CoE) და საარჩევნო სისტემების საერთაშორისო ფონდის (IFES) მხარდაჭერით განხორციელდა.

[თინათინ ზაზაძე, ახალციხე]