სატყეო სააგენტოს თანამშრომლებს პარკიდან წაქცეული ხეები გამოაქვთ

140 –მდე მეტყევე დასუფთავებისა და სამაშველო სამსახურების თანამშრომლებს წაქცეული ხეების გამოტანაში ეხმარება.

ბორჯომში სტიქიის ზონაში სამცხე–ჯავახეთის და ქვემო ქართლის სატყეო სამსახურების თანამშრომლები მუშაობენ. ისინი მთელი ღამის განმავლობაში ქარბორბალასა და მეწყერის მიერ მოგლეჯილი წიწვოვანი და ფოთლოვანი ხეებით ჩაკეტილი პარკის მიმდებარე ტერიტორიის გაწმენდით სამუშაოებში მონაწილეობდნენ.

მეტყევეებს პარკის ტერიტორიიდან ძლიერი ქარისგან წაქცეული ხეები გამოქვთ. მათი განმარტებით, გამოტანილი ხე–ტყე ბორჯომის მუნიციპალიტეტის გამგეობას გადაეცემა. ადგილობრივი თვითმმართველობა კი შეშას სოციალურად დაუცველ მოსახლეობას დაურიგებს.
ბორჯომში იმყოფება ეროვნული სატყეო სააგენტოს უფროსი მოადგილე ირაკლი გოდუაძეც.

გარემოს დაცვის სამინისტროს ინფორმაციით, ბორჯომში სტიქიის შედეგად მოტეხილია ასობით ხე, ჩაიხერგა ე.წ პლატოს გზებიც. ადგილზე რჩებიან გარემოსდაცვითი ზედამხედევლობის დეპარტამენტის თანამშრომლებიც.

შეგახსენებთ, გუშინ, 4 აგვისტოს, ბორჯომი ძლიერმა წვიმამ, სეტყვამ და ქარიშხალმა დააზარალა. განსაკუთრებული ზიანი მიადგა ბორჯომის ისტორიულ პარკს.

გარემოს ეროვნული სააგენტოს ინფორმაციით, 8 აგვისტოს ჩათვლით აღმოსავლეთ საქართველოში ნარჩუნდება არამდგრადი ამინდი. მოსალოდნელია ხანმოკლე წვიმა ელჭექით, ზოგან ძლიერი. ზოგან შესაძლებელია სეტყვა, ქარის შკვალური გაძლიერება და ცალკეულ პატარა მდინარეებზე წყალმოვარდნები აღინიშნოს.

[თინათინ ზაზაძე, ბორჯომი]