სტიქიამ ახალციხის მეორე სკოლასთან გზა დაანგრია [Photo]

გუშინ, 3 აგვისტოს მეორე საჯარო სკოლასთან მოვარდნილმა ღვარცოფმა ინფრასტრუქტურას მნიშვნელოვანი ზიანი მიაყენა. ჩაიხრამა გზები, ძლიერი წყლის ნაკადმა ასფალტი მთლიანად წაიღო.

თვითმხილველების ინფორმაციით, მოვარდნილ ღვარცოფს შემთხვევით გადაურჩა 16 წლის გოგონა.

„კიბეებზე ამოდიოდა, წყალი, რომ მოვარდა შემაღლებულ ადგილზე ასვლა მოასწრო, მერე ჩვენ შევიფარეთ“, – ამბობს ერთ–ერთი თვითმხილველი.

შეგახსენებთ, რომ გუშინ, 3 აგვისტოს ახალციხეს ძლიერმა წვიმამ და სეტყვამ შეუტია. სტიქიამ განსაკუთრებით თამარაშვილის, კოსტავას, მიქუტიშვილისა და ხანძთელის ქუჩები დააზიანა. წვიმისგან მოვარდნილი ნიაღვრები შევარდა სხვა ქუჩებზე მცხოვრებლებთანაც.

წვიმისა და სეტყვის გამო კოსტავას ქუჩაზე სახლს სახურავი ნაწილობრივ გადაეხადა. სხვა ქუჩებზე წვიმა ჩავიდა ადგილობრივების სახლებში, დაიტბორა სარდაფები და ფარეხები. სეტყვისგან დაზიანდა ავტომანქანები.













[თინათინ ზაზაძე, ახალციხე]