ქრთამის აღების ფაქტზე რწმუნებულია დაკავებული

წყალთბილის ტერიტორიული ორგანოს რწმუნებული ფინანსთა სამინისტროს საგამოძიებო სამსახურის თანამშრომლებმა დააკავეს. მას ქრთამის აღებაში ადანაშაულებენ. ფინანსთა სამინისტროს საგამოძიებო სამსახურის ინფორმაციით, ვართანიანმა მოზარდი მსხვილფეხა პირუტყვის შეძენის შესახებ, ყალბი ცნობის დამზადების სანაცვლოდ, ქრთამი 600 ლარი აიღო. გამოძიება სისხლის სამართლის კოდექსის 338-ე მუხლის პირველი ნაწილით მიმდინარეობს, რაც 6-დან 9 წლამდე თავისუფლების აღკვეთას ითვალისწინებს.

ახალციხის მუნიციპალიტეტის გამგეობაში განმარტავენ, რომ აღნიშნულ ფაქტზე მას შემდეგ გაიგეს, რაც პეტროს ვართანიანი დააკავეს.

ახალციხის მუნიციპალიტეტის გამგებლის მოვალეობის შემსრულებელი ბესიკ ბლიაძე დაკავებულს დადებითად ახასიათებს და ამბობს, რომ წყალთბილის ტერიტორიული ორგანოს რწმუნებულს სულ რამდენიმე თვეა რაც იცნობს.

მისი თქმით, ვიდრე არ დამტკიცდება, რომ პეტროს ვართანიანი დამნაშავეა, ამ თანამდებობაზე კონკურსი არ გამოცხადდება.

”თუ მისი ბრალეულობა დამტკიცდა და აღიარა, რომ დამნაშავეა, მხოლოდ ამის შემდეგ დავნიშნავთ ახალ რწმუნებულს”, - ამბობს ბესიკ ბლიაძე.

[sknews.ge]