გამგებლის წარმომადგენლებს ახალი ვალდებულებები დაეკისრათ

შესაბამის საკითხზე საკრებულოს სხდომაზე დღეს, 30 ივნისს იმსჯელეს. იუსტიციის მინისტრის ბრძანებით, გამგებლის წარმომადგენელი ვალდებულია:

• სამედიცინო დაწესებულების გარეთ, (ქუჩაში, სახლში, ორგანიზაციაში და ა.შ) ბავშვის დაბადების შემთხვევაში, სამოქალაქო აქტების რეგისტრაციის ორგანოს ინფორმაცია ერთი თვის ვადაში აცნობოს.

• პირის გარდაცვალების შემთხვევაში, მისი რეგისტრაციისათვის , წარმომადგენელს ეკისრება ვალდებულება, სამოქალაქო აქტების რეგისტრაციის ორგანოს მიმართოს და შემთხვევის შესახებ შესაბამისი ოქმი შეადგინოს. ამ ვალდებულების შესრულება მას ამბის გაგებიდან 5 სამუშაო დღის ვადაში შეუძლია.

• იმ შემთხვევაში თუ წარმოამდგენელს არ აქვს საკმარისი ან უტყუარი ინფორმაცია პირის გარდაცვალების შესახებ და შეუძლებელია საქართველოს იუსტიციის მინისტრის ბრძანებით დამტკიცებული ფორმის – ოქმის შევსება, იგი ვალებულია, სამოქალაქო აქტების რეგისტრაციის ორგანოს, პირის გარდაცვალების შესახებ, ოქმის შედგენის გარეშეც შეატყობინოს.

პირის დაბადებისა და გარდაცვალების შესახებ ინფორმაციას შესაბამის ორგანოებს, ამ დრომდე, სამედიცინო დაწესებულებები აწვდიდნენ.

გამგებლის წარმომადგენელთა უფლება–მოსილებების გაზრდისთვის, ახალციხის მუნიციპალიტეტის გამგეობის შესაბამის დებულებაში ცვლილება შევიდა. მას მხარი საკრებულოს მე–9 სხდომაზე მყოფმა დეპუტატებმა ერთხმად დაუჭირეს.

[თაკო ფეიქრიშვილი, ახალციხე]