დღეს, 28 ივნისს, პროექტის პრეზენტაცია ახალციხესა და ახალქალაქში შედგა. შეკრებილებს პროექტი საპარტნიორო ფონდის აღმასრულებელი დირექტორის მოადგილემ ნათია თურნავამ, ინოვაციების და ტექნოლოგიების სააგენტოს თავმჯდომარემ ირაკლი ქაშიბაძემ, მისმა მოადგილემ ავთანდილ კასრაძემ და „სტარტაპ საქართველოს“ დირექტორმა ვაჟა მენაბდემ გააცნეს.
მათი განცხადებით, პროგრამის მონაწილე შეიძლება გახდეს საქართველოს ნებისმიერი მოქალაქე, ან ჯგუფი, ვისაც აქვს სიახლეზე ორიენტირებული ბიზნეს წინადადება და განხორციელებისათვის თანხა სჭირდება. ისინი 15.000–დან 100 000 ლარამდე თანხით დაფინანსდებიან.
ორგანიზატორების განმარტებით, არ არის აუცილებელი ბიზნეს იდეა იყოს მსოფლიო მასშტაბის, შეზღუდული არ არის დარგები, მაგრამ, რაც ყველაზე მთავარია, იდეა ინოვაციური, ახლებური უნდა იყოს.
„შეიძლება რომელიმე არსებული პროდუქტის ან ტექნოლოგიის გაუმჯობესებული ვერსია იყოს, ან ნებისმიერი ახალი იდეა, რომელიც გამოდგება სოფლის მეურნეობაში, მშენებლობაში, კომპიუტერულ თუ მობილურ ტექნოლოგიებში, ფარმაცევტიკაში და ა.შ.“, – ამბობს "საპარტნიორო ფონდის“ აღმასრულებელი დირექტორის მოადგილე ნათია თურნავა.
პროგრამის ერთი მოდელით, ბენეფიციარმა თანამონაწილეობის თანხა, პროექტის ჯამური ღირებულების 10%–ის ოდენობით უნდა შეიტანოს. იმ შემთხვევაში, თუ იდეა მაღალტექნოლოგიური დარგის უნიკალურ, ინოვაციურ გამოგონებას გულისხმობს, ბენეფიციარს პროექტის თანადაფინანსება აღარ მოეთხოვება.
„სამცხე–ჯავახეთში ძალიან საინტერესო ინტელექტუალური პოტენციალია. ჩვენ ვეძებთ პროექტებს ახალი ტექნოლოგიების მიმართულებით. შეიძლება ეს იყოს ინტერნეტ–კომპიუტერული, ბიო ან სხვა ტექნოლოგიები. იდეებს უცხოელი ექსპერტები შეაფასებენ, ის ადამიანები, რომლებსაც აქვთ დაახლოებით ისეთი ინვესტიციები განხორციელებული, როგორიც არის facebook-ი, googl-ი, twitter–ი და ა.შ.“– ამბობს "ინოვაციებისა და ტექნოლოგიების სააგენტოს“ თავმჯდომარე ირაკლი ქაშიბაძე.
პროექტის პრეზენტაციას ახალციხის, ადიგენის, ასპინძისა და ბორჯომის მუნიციპალიტეტების მცხოვრებლები დაესწრნენ. მათ საკუთარი ბიზეს–იდეების შესახებ ორგანიზატორებს კითხვები დაუსვეს.
"იდეები უკვე მაქვს. ვაპირებ რომ ჩემს დასთან და სხვა გუნდელებთან ერთად ჩავერთო პროექტში. ტექნოლოგიური მიმართულებით მინდა მონაწილეობის მიღება. შესაძლებელია გავაუმჯობესოთ აქამდე შექმნილი ხელსაწყოები, ან დავამატოთ ახალი“– ამბობს შეხვედრის ერთ–ერთი მონაწილე კარლო ხუციშვილი.
„ხელნაკეთ ნივთებს ვამზადებ. ძირითადად ნაჭერზე ვმუშაობ: ჩანთა, აქსესუარები, კედლის დეკორაცია და ა.შ. ასპინძაში მაქვს მიწა შეძენილი და მინდა სახელოსნოს გაკეთება. საკუთრი ხარჯებით ძალიან ძნელია, მინდა საგამოფენო დარბაზიც იყოს და სამუშაო ოთახებიც. დაფინანსებისთვის ჯერ არავისთვის მიმიმართავს და მინდა, რომ ამ პროექტში ვცადო ბედი. აქ მითხრეს, რომ კარგი იდეაა და განაცხადი უნდა შევავსო“, – ამბობს ასპინძის მკვიდრი მაკა ბიბილაშვილი.
შეხვედრაზე ჯგუფური მონაწილეობის სურვილი გამოთქვა ტოლოშის სათემო სარესურსო ცენტრმაც.
"ჩემი და ჩემი თანამშრომლების იდეაა, რომ ბაქმაზი ვაწარმოოთ. ეს ძალიან იშვიათი ნაწარმია, მაგრამ მის დამზადებაზე დაინტერესება ამ დრომდე არავისგან არ არის. ვფიქრობთ, რომ მომგებიანი საქმე იქნება და მეტი ქალი დასაქმდება. მითხრეს, რომ თემა პროგრამაში ჯდება და განაცხადს განიხილავენ“, – ამბობს სოფელ ტოლოშის მკვიდრი ანა დავლაშერიძე.
პროგრამაში მონაწილეობის მსურველთათვის, განაცხადების მიღება 2016 წლის 17 ივნისს დაიწყო და 31 ივლისის ჩათვლით გაგრძელდება. განცხადების შეტანა ელექტრონულად არის შესაძლებელი. დეტალური ინფორმაცია შეგიძლიათ ნახოთ ვებ–გვერდზე – www.startup.gov.ge . მათ, ვისაც ინტერნეტსა და ელექტრონულ ტექნოლოგიებზე ხელი არ მიუწვდება, დახმარებას სამცხე–ჯავახეთის გუბერნიაში გაუწვენ.
[თაკო ფეიქრიშვილი, ახალციხე]