ახალციხეში რუსული პროპაგანდის წინააღმდეგ მიმართული კონცერტისთვის ემზადებიან

„საღი აზრის იურისტი არ დარჩენილა, რომელსაც არ ეთქვას, რომ ხელისუფლება უხეშად და უკანონოდ გვართმევს ფუნდამენტურ უფლებას. ჩვენ არ ვაპირებთ უბრძოლველად დავთმოთ ეს უფლება, ვაპირებთ დავდგათ სცენა, ავაწყოთ აპარატურა და გავმართოთ კოცერტი.

კონცერტისთვის ხელისშეშლა გაცილებით ძვირი დაუჯდებათ“, – აცხადებს პალტფორმის აქტივისტი და ტელეკომპანია „ტაბულას“ დირექტორი თამარ ჩერგოლეიშვილი.

კონცერტის ორგანიზატორები მოქალაქეებს ურიგებენ ფლაერებს სახელწოდებით: „ნუ დაუჯერებ კრემლის პროპაგანდას“, „დაიცავი თავისუფლება“.

შეგახსენებთ, პლატფორმას "დაცავი თავისუფლება" ანტიდასავლური პროპაგანდის წინააღმდეგ მიმართული კამპანიის ფარგლებში, ჯგუფ "გამოუვალი მდგომარეობის" კონცერტის გამართვა, ახალციხის ციხის ამფითეატრში სურდა. ორკვირიანი მოლაპარაკებების შემდეგ, მოულოდნელად, კონცერტამდე რამდენიმე დღით ადრე, ციხის ადმინისტრაციამ პლატფორმას ამფითეატრის ქირა 300–დან 5.000 ლარამდე გაუზარდა, იმ არგუმენტით, რომ "გამოუვალი მდგომარეობა" მოთხოვნადი ჯგუფია.

ამის შემდეგ, პლატფორმამ კონცერტის ჩატარება მესხეთის თეატრის მიმდებარე ტერიტორიაზე გადაწყვიტა და ამის შესახებ ახალციხის მერიას წერილობით აცნობა. გუშინ, 7 ივინისს, საღამოს, პლატფორმას „დაიცავი თავისუფლება“ ახალციხის მერიამ ქალაქის ცენტრალურ პარკში, თეატრთან, კონცერტის ჩატარებაზე წერილობით უარი გაუგზავნა; იმის შესახებ, თუ რატომ ჩაითვლება ხვალ, თეატრთან „გამოუვალი მდგომარეობის“ მიერ კონცერტის გამართვა უკანონოდ, მერია "შეკრებებისა და მანიფესტაციების შესახებ“ კანონის სხვადასხვა მუხლების მოშველიებით განმარტავს. იურისტები კი ამბობენ, რომ მერიას უარის თქმის საფუძველი არ ჰქონდა. დღეს განცხადება გაავრცელეს არასამთავრობო ორგანიზაციებმაც, რომლებიც ირწმუნებიან, რომ მუნიციპალიტეტის მერიის მხრიდან სახეზეა კონსტიტუციით აღიარებული შეკრების უფლების განხორციელების შეზღუდვის მცდელობა.

"დაიცავი თავისუფლებას" ერთ–ერთი აქტივისტი, ტელეკომპანია "ტაბულას" დირექტორი თამარ ჩერგოლეიშვილი ამბობს, რომ წინააღმდეგობის მიუხედავად კონცერტი მაინც გაიმართება.

"გამოუვალი მდგომარეობის" კონცერტი ახალციხეში, დღეს, 8 ივნისს, 18:00 საათზეა დაგეგმილი.

პლატფორმა დაიცავი თავისუფლება აერთიანებს აქტივისტებს, დამოუკიდებელ ჯგუფებს, არასამთავრობო და მედიაორგანიზაციებს საქართველოში. პლატფორმა რუსული პროპაგანდის წინააღმდეგ მუშაობს.

დაიცავი თავისუფლება 2015 წლის ოქტომბერში დაფუძნდა. პლატფორმის სურვილია მოსახლეობის ცნობიერების ამაღლება რუსული პოლიტიკის მიზნებთან დაკავშირებით. მისი მიზანია კრემლის პროპაგანდის ძალისხმევის გამოვლენა და საქართველოს ევროატლანტიკური მისწრაფებების გაზრდა.




[თინათინ ზაზაძე, ახალციხე]