თეატრი: რუსული პროპაგანდის წინააღმდეგ მიმართული კონცერტი ხელს შეგვიშლის

მესხეთის სახელმწიფო დრამატულ თეატრში დღეს, 8 ივნისს, 19:00 საათზე, სპექტაკლი „უსახელო ვარსკვლავი“ იმართება. ერთი საათით ადრე, 18:00 საათზე კი თეატრის წინ, ქალაქის ცენტრალურ პარკში პლატფორმა „დაიცავი თავისუფლება“ რუსული პროპაგანდის წინააღმდეგ კონცერტის გამართვას გეგმავს.

თეატრის დირექტორის იკრალი ათუნაშვილის განცხადებით, კონცერტის გამართვა წარმოდგენის ჩატარებას ხელს შეუშლის: „ისეთი ხმაური იქნება, წარმოდგენის გამართვა შეუძლებელია. სალაროსთან ვიღაცა რომ ხმაურობს, მაშინაც კი შემოდის დარბაზში ხმა და ამხელა ღონისძიების ჩატარება თეატრის წინ, პირდაპირ სპექტაკლის ჩაშლას ნიშნავს“.

მისი თქმით, გარდა იმისა, რომ ხმაური იქნება, თუ სცენა თეატრის წინ აეწყობა, შენობაში ხალხის შესვლა შეუძლებელი იქნება: „დაგეგმილი გვაქვს სპექტკალი სამი–ოთხი დღით ადრე, აფიშებია გაკრული და ხალხი რომ მოვა, რა ვუთხრათ?!“

ათუნაშვილის განცხადებით, სპექტაკლის დაგეგმვამდე თუ იქნებოდა მისთვის ცნობილი, რომ აქ კონცერტის გამართვა სურდათ, წარმოდგენას სხვა დროს დანიშნავდნენ: „ახლა ვერაფერს შევცვლი, გარდა ამისა, კულტურის სამინისტრო სპექტაკლების გამართვას გვთხოვს, შენობაში სარემონტო სამუშაოებმა კი აქამდე ისეც შეგვიშალა ხელი“.

რომ არა დაგეგმილი წარმოდგენა, ათუნაშვილი ამბობს, რომ მას აღნიშნულ ღონისძიებასთან რაიმე საწინააღმდეგო არ ექნებოდა: „ეს არც ჩემი ადგილია და საერთოდ, რა შეხება მაქვს ეგეთ საკითხებთან. უბრალოდ დაგეგმილ წარმოდგენას ახლა ვეღარაფერს მოვუხერხებ“.

შეგახსენებთ, რომ პლატფორმა „დაიცავი თავისუფლება“ კონცერტის გამართვას ‘ახალციხის ციხეზე“ გეგმავდა, თუმცა აქ მათ ქირისთვის ნაცვლად 300 ლარისა 5 000 მოსთხოვეს. ამის შემდეგ პლატფორმის აქტივისტებმა ღონისძიების გამართვა ქალაქის ცენტრალურ პარკში, თეატრის მიმდებარე ტერიტორიაზე გადაწყვიტეს და ამის შესახებ ახალციხის მერიას, გუშინ 6 ივნისს წერილობით შეატყობინეს. მერიამ კი პლატფორმას უარი უთხრა.

კონცერტი ლიტვის საელჩოს დაფინანსებით იმართება და რუსული პროპაგანდის წინააღმდეგაა მიმართული.

მიუხედავად მერიის უარისა, პლატფორმა დღეს, 8 ივნისს, ქალაქის ცენტრში კონცერტის ჩატარებას მაინც აპირებს. სცენის მონტაჟი უკვე დაწყებულია.

[თამუნა უჩიძე, ახალციხე]