‘დაიცავი თავისუფლება’: მერიამ კამპანიის მიზნის შესახებ იცოდა

დღეს, 8 ივნისს, დაახლოებით 16:30 საათზე, ახალციხის მერიამ განაცხადება გაავრცელა, რომლის თანახმად, მერიამ კონცერტის მიზნების შესახებ არაფერი იცოდა და გარკვეული ძალები, შეგნებულად ცდილობენ საზოგადოების შეცდომაში შეყვანას.

გიორგი ნონიაშვილი ამბობს, რომ მერია ცრუობს. პლატფორმას არც ჰქონდა ამ დეტალების შეტყობინების ვალდებულება, თუმცა, მიუხედავად ამისა, მერია საქმის კურსში მაინც ჩააყენა.

„ჩვენ ახალციხის მერიას წარუდგინეთ განცხადება, რომ იმართება აქცია–კონცერტი „გამოუვალი მდგომარეობის“. შეგვეძლო ეს არ გაგვეკეთებინა, იმიტომ, რომ კანონი შეკრებისა და მანიფესტაციის შესახებ არ გვაკისრებს ვალდებულებას, ეს უბრალოდ კეთილი ჟესტი იყო, რომ მათ უსაფრთხოების ზომები მიეღოთ. მერია ცრუობს, რომ არ იცოდა აქციის მიზანი. მშვენივრად იცოდა კამპანია დაიცავი თავისუფლებას მიზანი, ის იყო წინასწარ გაფრთხილებული და ყველა საკითხზე შეთანხმებული“,–აცხადებს გიორგი ნონიაშვილი.

შეგახსენებთ, ახალციხეში რუსული პროპაგანდის წინააღმდეგ მიმართული აქცია–კონცერტის გამართვა, გაპრობლემდა. ჯერ ახალციხის ციხემ კონცერტის ორგანიზატორებს ამფითეატრის ქირა გაუძვირა, შემდეგ კი მერიამ თეატრის მიმდებარე ტერიტორიაზე კონცერტის გამართვაზე უარი განაცხადა, მიუხედავად იმისა, რომ იურისტების განმარტებით, ამის უფლება არ ჰქონდა. მოგვიანებით, მას შემდეგ, რაც მომხდარი მედიის განხილვის თემად იქცა და არასამთავრობო უწყებებმაც განცხადება გაავრცელეს, სადაც ნათქვამი იყო, რომ მერიის მხრიდან სახეზე იყო კონსტიტუციით აღიარებული შეკრების უფლების განხორციელების შეზღუდვის მცდელობა, მერიაში განაცხადეს, რომ წერილი არასწორად გაიგეს და ისინი კონცერტის ჩატარებას არ ეწინააღმდეგებოდნენ.

მოგვიანებით კი უკვე ოფიციალური განცხადება გაავრცელეს, რომელშიც ნათქვამია, რომ მათი ეჭვით, „გარკვეული ძალები თუ მედია–საშუალებები განზრახ ცდილობენ აღნიშნული საკითხის სხვა კონტექსტში განხილვას და საზოგადოების შეცდომაში შეყვანას’. განცხადებაში ნათქვამია, რომ ახალციხის მერიაში შესულ – ა(ა)იპ სამოქალაქო განათლების ფონდის მიმართვაში არ იყო მითითებული ღონისძიებების მიზანი. მერიისთვის არ იყო ცნობილი , ეძღვნებოდა თუ არა პლატფორმა „დაიცავი თავისუფლება“–ს მიერ ორგანიზებული კონცერტი რაიმე კონკრეტულ საკითხს, ამ შემთხვევაში – ევროინტეგრაციის თემებს, ანტირუსულ პროპაგანდას თუ რაიმე სხვა მიზანს: „წინამდებარე საკითხის წარმოდგენის ვალდებულება ეკისრებოდათ ღონისძიების ორგანიზატორებს, რაც მათ მიერ არ იქნა განხორციელებული. ორგანიზატორს მითითებული ჰქონდა მხოლოდ ჯგუფი „გამოუვალი მდგომარეობის“ კონცერტის გამართვა“.

[ვარლამ წიკლაური, ახალციხე]