'ვაინახური' კულტურის დღე ახალციხეში

ანსამბლ ‘პანკისის’ წევრები, ახალიციხის ციხის ამფითეატრში შეკრებილი მსმენელისა და მაყურებლისთვის, ნაციონალურ და ქართულ ხალხურ სიმღერებს მღეროდნენ. უმღერეს სამშობლო ჩეჩნეთსა და სამშობლო საქართველოს, შეასრულეს რელიგიური საგალობელი და ცეკვა „ლეზგინკაც“.

„ყველა კავკასიელები ვართ, თითქმის ერთნაირი კულტურა გვაქვს, მაგრამ რაც დღეს მოვისმინე, ჩემთვის მართლა სიახლე იყო“, – გვითხრა საღამოს დასრულების შემდეგ ერთ–ერთმა მსმენელმა, მარიამ გოგოლაძემ.

ახალციხელი მსმენელითა და ქალაქის ღირსშესანიშნაობებით კმაყოფილნი დარჩნენ ანსამბლის წევრებიც.

„პირველად ვართ ახალციხეში, ამ ციხესიმაგრემ და თქვენმა ქალაქმა დიდი შთაბეჭდილება დატოვა. ძალიან თბილი ხალხი ცხოვრობს აქ და კმაყოფილი ვართ მათი თბილი მიღებით“, -ამბობს ანსამბლის წევრი მექა ფარეულიძე.

ახალციხეში „პანკისის“ საღამომ სრული ანშლაგით ჩაიარა. ახალციხემდე ფესტივალს დუშეთმა უმასპინძლა. ორგანიზატორები ამბობენ, რომ ემოციებით სავსე დარბაზი დახვდათ დუშეთშიც. ხვალ ფესტივალი ქალაქ ქუთაისში გრძელდება და ზეგ ბათუმში სულდება.

ვაინახური კულტურის დღეები საქართველოს რეგიონებში საქართველოს პრეზიდენტის ადმინისტრაციის მხარდაჭერით, პანკისის ქალთა სათემო ორგანიზაციისა და ანსამბლ „პანკისის“ ორგანიზებით იმართება. რეგიონებში ფესტივალის მხარდამჭერი ადგილობრივი თვითმმართველობაა. საინფორმაციო მხარდამჭერის როლი კი ადგილობრივ მედიას აქვს. ახალციხეში ფესტივალის მხარდამჭერი საინფორმაციო სააგენტო „სამხრეთის კარიბჭე“ იყო.

ფესტივალის ერთ–ერთი ორგანიზატორის, კახეთის საინფორმაციო ცენტრის ხელმძღვანელის გელა მთივლიშვილის თქმით, ფესტივალის მიზანი ვაინახური კულტურის პოპულარიზაცია, პანკისის ხეობის და იქ მცხოვრები ეთნიკური ქისტების მიმართ ნეგატიური დამოკიდებულების შემცირების ხელშეწყობაა.

„მე ვფიქრობ, რომ ამ ღონისძიებამ თავისი მისია შეასრულა. აქ რამდენიმე ათეული ადამიანი გვესწრებოდა და ყველამ ნახა, რომ პანკისი არ არის ისეთი საშიში, როგორც ეს ვრცელდება ხოლმე და ძალიან მიხარია“, - ამბობს გელა მთივლიშვილი.

ფესტივალს ახალციხის მერიის წარმომადგენელები ესწრებოდნენ. კონცერტის დასრულების შემდეგ, მერიამ ანსამბლის წევრები სიმბოლურად, ყვავილებითა და წიგნებით დაასაჩუქრა.

„შესანიშნავი კოლექტივი გვეწვია, რომლებმაც წარმოადგინეს არამარტო თავიანთი ნაციონალური კულტურა, არამედ ქალთური კულტურის შესანიშნავი ნიმუშები. ძალიან მიხარია, რომ ვართ მრავალეროვანი ქვეყანა და სხვა ერის წარმომადგენლები აქ თავს გრძნობენ, როგორც საკუთარ სამშობლოში“,- ანაცხადა ახალციხის მერის მოადგილემ ზაზა თამარაშვილმა.

[ლუბა გიორგაძე, ახალციხე]