ახალციხე ვაინახური კულტურის ფესტივალს უმასპინძლებს

ფესტივალი საქართველოს პრეზიდენტის ადმინისტრაციის მხარდაჭერით, საქართველოს ხუთ რეგიონში გაიმართება. ღონისძიებები ახალციხეში, ქუთაისში, ოზურგეთში, ბათუმსა და მესტიაში ივნისშია დაგეგმილი.

ფესტივალის მიზანი ვაინახური კულტურის პოპულარიზაცია, პანკისის ხეობის და იქ მცხოვრები ეთნიკური ქისტების მიმართ ნეგატიური დამოკიდებულების შემცირების ხელშეწყობაა.

„მსოფლიოში ერთ–ერთ ყველაზე პოპულარულ საძიებო სისტემაში – Google, თუ ჩაწერთ სიტყვა პანკისი, ყველაზე ხშირად იძებნება მასალები: პანკისი, „ისლამური სახელმწიფო“; ვაჰაბიზმი; შემზარავი კადრები პანკისიდან; ტერორიზმი; პანკისი – ნელი მოქმედების ნაღმი; პანკისი – თურქეთი – სირია და ა.შ“, – ამბობს პროექტის თანაორგანიზატორი, „სამოქალაქო აქტივობების ცენტრის“ პროექტების მენეჯერი გელა მთივლიშვილი.

გელა მთივლიშვილი, რომელიც ამავე დროს, კახეთის საინფორმაციო ცენტრის რედაქტორია და პანკისის თემაზე არაერთი მასალა აქვს მომზადებული, ამბობს, რომ 2013 წლიდან პანკისის ხეობა კიდევ ერთხელ მოექცა მედიის ყურადღების ცენტრში. იმ ფაქტებმა, რომ ტერორისტული ორგანიზაცია „ისლამური სახელმწიფოს“ ორი ლიდერი წარმოშობით პანკისიდანაა, სირიაში 50–ზე მეტი ახალგაზრდაა წასული და მათ შორის 14 დაიღუპა, ხელი შეუწყო პანკისის ხეობის და იქ მცხოვრები ეროვნული უმცირესობის კიდევ უფრო მარგინალიზებას, ვიდრე ეს 2001–2002 წლების მოვლენების შედეგად იყო: „ამან პანკისის ხეობაში სამოქალაქო ინტეგრაციის თვალსაზრისით არსებული ისედაც არასახარბიელო ვითარება კიდევ უფრო გააუარესა როგორც თემის, ასევე ხეობის მიმართ ნეგატიური დამოკიდებულებისა და სტერეოტიპების გამოვლინებით“.

კახეთის საინფორმაციო ცენტრის ინფორმაციით, პანკისის ხეობაში ძირითადად მუსლიმები ცხოვრობენ. თემის ჯგუფები, ფუნდამენტური და ე.წ. ტრადიციული ისლამის მიმდევრები თავისი რელიგიური მისწრაფებებით ერთმანეთისგან განსხვავდებიან. ფუნდამენტური ისლამის მიმდევრებისთვის სიმღერა და ცეკვა მიუღებელია, რასაც ისინი რელიგიური მოსაზრებებით ხსნიან.

„ბოლო პერიოდში, ბევრმა ახალგაზრდამ, ვისაც ხეობის, თემის, კულტურული მრავალფეროვნების წარმოჩენა შეეძლო, უარი თქვა ცეკვასა და სიმღერაზე. ისინი კი, ვინც ამ დრომდე მონაწილეობენ სხვადასხვა ღონისძიებებში, მხარდაჭერის გარეშე არიან დარჩენილები“, – ამბობს გელა მთივლიშვილი.

ვაინახური კულტურის პოპულარიზაცია, ამ პროცესში ქისტი ახალგაზრდების ჩართვა და ეთნიკური უმცირესობის სამოქალაქო ინტეგრაციის ხელშეწყობაა პანკისის ხეობის ქალთა სათემო ორგანიზაციის პროექტის მიზანი. პროექტის განხორციელებას მხარი საქართველოს პრეზიდენტის ადმინისტრაციამ დაუჭირა.

ვაინახური კულტურის ფესტივალი ახალციხეში, ქუთაისში, ოზურგეთში, ბათუმსა და მესტიაში რეგიონული მედიაორგანიზაციების მხარდაჭერით გაიმართება. ახალციხეში ფესტივალის მხარდამჭერი საინფორმაციო სააგენტო „სამხრეთის კარიბჭეა“.

ფესტივალის დროის, ადგილისა და პროგრამის შესახებ ზუსტი ინფორმაცია მაისის შუა რიცხვებში გავრცელდება.

ანსამბლი პანკისი – „მე მოვალ შენთან“

ანსამბლი „პანკისი“ პანკისის ხეობაში [კახეთი, ახმეტის მუნიციპალიტეტი] 2002 წლიდან არსებობს. ანსამბლის ხელმძღვანელია ბელა მუთოშვილი. სიმღერა „მე მოვალ შენთან“ სამშობლოს მონატრებაზეა. სოლისტი ლეილა აჭიშვილი. კახეთის საინფორმაციო ცენტრი

[ნინო ნარიმანიშვილი, ახალციხე]