ასპინძის გამგეობა ნაქალაქევში ხანძრისგან დაზარალებულებს დაეხმარა

ასპინძის მუნიციპალიტეტის ბიუჯეტიდან ბერიძეებისთვის სამშენებლო მასალების შესაძენად 3 000 ლარი გამოიყო. გარდა აღნიშნულისა, ადგილობრივი თვითმმართველობის და ააიპ–ების თანამშრომლებმა დაზარალებული ოჯახისთვის თანხა შეაგროვეს. ამ ფულით ბერიძეებს სარეცხის მანქანა, ტელევიზორი, სხდავადასხვა სახის საყოფაცხოვრებო ნივთები და საკვები პროდუქტები შეუძინეს.

მუნიციპალიტეტის გამგებელმა ლევან ცაბაძემ, საკრებულოს თავმჯდომარის მოადგილემ ნუგზარ ლონდარიძემ და გამგეობის სხვა თანამშრომლებმა ბერიძეების ოჯახს საჩუქრები გუშინ, 2 ივნისს გადასცეს.

„1500 ლარის სხვადასხვა საჭირო ნივთი შევიძინეთ. რაც შეეხება სამშენებლო მასალებს, დაზარალებულ ოჯახს ხანძრიდან რამდენიმე კვირაში გადავეცით“, – ამბობს ასპინძის მუნიციპალიტეტის ადმინისტრაციული სამსახურის უფროსი ანა ტივაძე.

შეგახსენებთ, რომ სოფელ ნაქალაქევში ბერიძეების სახლს ცეცხლი 31 მარტს გაუჩნდა. ხანძარს წლინახევრის გოგონა ემსხვერპლა.



[თინათინ ზაზაძე, ასპინძა]