ახალციხეში ფერების ფესტივალი მოეწყო

პირველ ეტაპზე, ფესტივალის მონაწილეებმა სახე ფერადი საღებავებით მოიხატეს, შემდეგ კი, იასამნისფერი, ლურჯი, მწვანე და ყვითელი ფერები ორგანიზატორებმა ჰაერში გაუშვეს.

„დღესასწაული სათავეს იღებს ინდოეთიდან და აზიის სხვადასხვა ქვეყანაში ტარდება. მისი მიზანია სიყვარულის სახალხოდ დემონსტრირება. დღევანდელ დღეს ყველა ივიწყებს წყენას, ვინც გაბრაზებულია რიგდება, ხალისობს და სასიამოვნო დროს ატარებს“ , – ამბობს ერთ–ერთი ორგანიზატორი თამარ აბრამიშვილი.

ფერების ფესტივალის იდეა პაატა ბურჭულაძის პოლიტიკური მოძრაობა ,,სახელმწიფო ხალხისთვის“ ახალციხის ოფისის ხელმძღვანელს, ედუარდ კიკნაძეს გაუჩნდა: ,,ახალციხეში მსგავსი ღონისძიება პირველად გაიმართა. მისი მიზანი იყო ახალგაზრდების გამხიარულება და გააქტიურება. ვგეგმავთ, რომ მსგავსი ფესტივალი კიდევ გავმართოთ. თბილისში პარტნიორები ვნახეთ, რომლებიც შეგვპირდნენ, რომ დაგვეხმარებიან და მომავალში უფრო დიდი მასშტაბის იქნება“.

,,ფერების ფესტივალი“ დისკოთეკით დასრულდა.

[თაკო ფეიქრიშვილი, ახალციხე]