ბავშვთა საერთაშორისო ფესტივალი 'Brave Kids' დასრულდა

ფესტივალის დასკვნითი საღამო რაბათის ისტორიულ კომპლექსში 18:00 საათზე გაიხსნა. ქართულ, სომხურ, პოლონურ და ირანულ ნაციონალური ტანისამოსში გამოწყობილმა მონაწილეებმა სცენაზე ერთმანეთის ხალხური ცეკვები და სიმღერები შეასრულეს.

ქართული "იავნანა", სომხური "სირუნ–სირუნ", პოლონური "ნაქარგი ცხვირსახოცი მაქვს" და ირანული ცეკვა ერთ, საერთო წარმოდგენას ქმნიდა.

საკონცერტო ნომრებისათვის 21 მოზარდი ხუთი დღის განმავლობაში ემზადებოდა.

"ეს არ იყო სტანდარტული კონცერტი, სადაც ცალკე ცეკვა და ცალკე სიმღერაა ხოლმე წარმოდგენილი, ეს იყო მიქსი, სადაც სხვადახვა ქვეყნებიდან ჩამოსულმა ბავშვებმა ერთმანეთის ქვეყნებში არსებული კულტურა წარმოადგინეს“, – ამბობს ფესტივალის ორგანიზატორი ახალციხეში ცირა მესხიშვილი.

გარდა ქართველი, სომეხი, პოლონელი და ირანელი ბავშვებისა, დასკვნით ღონისძიებაზე ქორეოგრაფული ნომრები საქართველოს, ადიგენის, სოფელ ზარზმასა და ახალციხის, სოფელ სხვილისში არსებულმა ანსამბლებმაც წარმოადგინეს.

ფესტივალი ახალციხეში მერიის პატრონაჟით განხორციელდა.

"შეიძლება ითქვას, რომ მოლოდინი გაამართლა. ეს არის კულტურათა დიალოგის გამორჩეული მაგალითი. რამდენიმე დღეში შესწავლილი ერთმანეთის კულტურა ბავშვებმა შესანიშნავად შეასრულეს. დიდი სურვილი გავაქვს, რომ მომავალშიც გაგძელდეს ეს პროექტი და უფრო დიდი მასშტაბი მიეცეს“, – ამბობს ახალციხის მერის მოადგილე ზაზა თამარაშვილი.

შეგახსენებთ, რომ ბავშვთა საერთაშორისო ფესტივალის "Brave Kids"–ის (მამაცი ბავშვები) მონაწილეები ახალციხეში 20 ივნისს ჩამოვიდნენ. 8 დღის განმავლობაში მათ ერთმანეთის კულტურა, ტრადიციები და სამზარეულო გაიცნეს. გარდა ამისა, ახალციხესა და ადიგენში სხვადასხვა აქტივობები განახორციელეს.

ფესტივალის მონაწილეები ახალციხეს ხვალ, 29 ივნისს დატოვებენ.











[თაკო ფეიქრიშვილი, ახალციხე]