‘დროის მარცვლები’- ახალციხეში ფილმის ჩვენება მოეწყო

ფილმში „დროის მარცვლები“ სოფლის მეურნეობის პიონერის, ქრეი ფლაუერსის საქმიანობა ასახული. ქრეი დროის წინააღმდეგ ილაშქრებს, იმისთვის რომ საკვების მომავალი დაიცვას. იგი ფიქრობს, რომ სწრაფი კლიმატური ცვლილებები მეწარმეებს, გლობალური მაშტაბით ზიანს აყენებს, რაც იწვევს შიმშილსა და აჯანყებებს. სწორედ ამიტომ ფლაუერი და ფერმერები იწყებენ ერთობლივ მუშაობას, რათა ახალი ტექნოლოგიების შემუშავებით პირველ რიგში ყველაზე აუცილებელი რესურსი- მარცვლეული დაიცვან.

„ეს, არის ფილმი მცენარეების შენარჩუნებაზე, რომელიც თანაბრად მნიშვნელოვანია საქართველოსათვის და ამერიკისთვის, რადგან დიდი კლიმატური პრობლემების წინაშე ვდგავართ“, – ამბობს ამერიკის საელჩოს წარმომადგენელი რეიჩელ განდინ მარკი.

ღონისძიების ერთ-ერთი ორგანიზატორის და CineDOC-Tbilisi-ის ფესტივალის დირექტორის არჩილ ხეთაგურის თქმით, რეგიონში ფილმების გამართვის მიზანია, რჩეული ფილმების შესახებ იმ ადამიანებმაც შეიტყონ, ვინც დედაქალაქში ჩასვლასა და ფესტივალზე დასწრებას ვერ ახერხებს.
მისივე თქმით, რეგონებში საჩვენებელ ფილმებს მოსახლეობის ინტერესიდან გამომდინარე არჩევენ: „მაგალითად, სამცხე-ჯავახეთი აგრარული რეგიონია, ამიტომ გადავწყვიტეთ ფილმიც შესაბამისი ყოფილიყო და მცენარეების გადარჩენაზე გვეჩვენებინა“.

კინოფესტივალის ფარგლებში, რეგიონებში ფილმის ჩვენებები ყოველ თვეში იმართება. ორგანიზატორების თქმით, უახლოეს მომავალში ახალციხეში ჩამოსვლა და მსგავსი ღონისძიების გამართვა კიდევ იგეგმება.



[ლუბა გიორგაძე, ახალციხე]