აწყურის ღვთისმშობლის ხატი ამაღლების ტაძარში დააბრძანეს [Photo/Video]

აწყურის ღვთისმშობლის ხელთუქმნელი ხატის ასლი ახალციხეში, დღეს, 12 მაისს, ჩამოაბრძანეს. ხატი მაცხოვრის ამაღლების ტაძარში დააბრძანეს, სადაც მთელი ღამის განმავლობაში ღამისთევის ლოცვები აღევლინება.

ხატის ჩამობრძანებას ახალციხისა და ტაო–კლარჯეთის მიტროპოლიტი მეუფე თეოდორე, სასულიერო პირები და მორწმუნეები ამაღლების ტაძარში დახვდნენ.

„შევთხოვ ყოვლადწმინდა დედა ღვთისმშობელს, რომ მისი ლოცვით უფალმა გააძლიერო და გაამთლიანოს ჩვენი ხალხი, რათა ვიყოთ ერთი სამწყსო და ერთი მწყემსი უფალი ჩვენი იესო ქრისტე“,– მიმართა მაცხოვრის ამაღლების ტაძარში შეკრებილ მრევლს ახალციხისა და ტაო–კლარჯეთის მიტროპოლიტმა მეუფე თეოდორემ.



აწყურის ღვთისმშობლის ხელთუქმნელი ხატის ასლი ახალციხეში დილამდე დარჩება. ხვალ, 13 მაისს კი ხატს აწყურის ღვთისმშობლის მიძინების სახელობის ტაძარში დააბრძანებენ, სადაც საზეიმო წირვას მეუფე თეოდორე აღავლენს.

საზეიმო წირვა აწყურში 10:00 საათზე დაიწყება.

შეგახსენებთ, რომ აწყურის ღვთისმშობლის ხატით მსვლელობა ოფადან (თურქეთი) დაიწყო, 10 მაისს ხატი ბათუმში შეაბრძანეს,11 მაისს ხულოში, ახალციხის და აწყურის შემდეგ 13 მაისს (საღამო) ხელთუქმნელი ხატის ასლს ბორჯომში ჩააბრძანებენ. 14 მაისს ხაშურში, 15 მაისს გორში, 16 მაისს კი ხატს თბილისში, სვეტიცხოვლის სახელობის ტაძარში დააბრძანებენ.

17 მაისს 12:00 საათზე დაიწყება მსვლელობა ვარდების მოედნიდან სამების საკათედრო ტაძრამდე, სადაც კათოლიკოს-პატრიარქი გადაიხდის პარაკლისს და მრევლს დალოცავს.













[ვარლამ წიკლაური, ახალციხე]