ასპინძაში საჯარო მოხელეთა შესარჩევ ტესტირებაზე ყველა კონკურსანტი ჩაიჭრა

ასპინძის გამგეობაში 12 პოზიციაზე გამოცხადებული კონკურსის მეორე ეტაპი–ტესტირება 8 და 9 მაისს იუსტიციის სასწავლო ცენტრმა, ახალციხეში ჩაატარა.

56 კონკურსანტიდან ტესტირებაზე მხოლოდ 14 გამოცხადდა, თუმცა 51 პროცენტიანი ზღვარი ვერცერთმა ვერ გადალახა.

„ორმა კანდიდატმა მოგვმართა განცხადებებით, რომლებსაც ტესტირება ადრე აქვთ ჩაბარებული და კონკურსში მონაწილეობის გაგრძელებას ითხოვენ. რა გადაწყვეტილებას მიიღებს საკონკურსო–საატესტაციო კომისია, ჯერ უცნობია. კომისიის წევრები შესაძლოა დღესაც შეიკრიბნონ და ეს საკითხი განიხილონ“, – განაცხადა სატელეფონო საუბარში ასპინძის მუნიციპალიტეტის გამგეობის ადმინისტრაციული სამსახურის უფროსმა ანა ტივაძემ.

შეგახსენებთ, რომ ასპინძის მუნიციპალიტეტის გამგეობაში საჯარო მოხელეთა შესარჩევი კონკურსი მიმდინარე წელს პირველად გამოცხადდა. პირველ ეტაპზე 107 განაცხადი შევიდა, თუმცა გადარჩევის შემდეგ საკონკურსო კომისიამ 92 განაცხადი შეარჩია.

„92 აპლიკაცია იყო, თუმცა ერთ კანდიდატს რამდენიმე პოზიციაზე ჰქონდა განაცხადი გაკეთებული. ჯამში 56 კონკურსანტი იყო, რომლებიც გადავიდნენ მეორე ეტაპზე“, – ამბობს ანა ტივაძე.

კონკურსის შედეგად, თვითმმართველობამ 12თანამშრომელი, შემდეგ პოზიციებზე უნდა შეარჩიოს:

სამხედრო აღრიცხვისა და გაწვევის სპეციალისტი მობილიზაციის საკითხებში;
გამგებლის წარმომადგენელი სოფელ ჭობარეთში;
გამგებლის წარმომადგენელი სოფელ ძველში;
გამგებლის წარმომადგენელი სოფელ თმოგვში;
გამგებლის წარმომადგენელი სოფელ ნაქალაქევსა და ფიაში;
გამგებლის წარმომადგენელი სოფელ ვარგავსა და თოკში;
გამგებლის წარმომადგენელი სოფელ საროსა და ნიჯგორში;
გამგებლის წარმომადგენელი სოფელ ხერთვისსა და გულსუნდაში;
გამგებლის წარმომადგენელი სოფელ რუსთავში;
გამგებლის წარმომადგენელი სოფელ იდუმალაში;
გამგებლის წარმომადგენელი სოფელ ოთაში;
გამგებლის წარმომადგენელი სოფელ ივერიაში.

ასპინძის მუნიციპალიტეტის გამგეობაში კიდევ ერთი, საზოგადოებასთან ურთერთობის სპეციალისტის პოზიციაა ვაკანტური. როდის გამცხადდება აღნიშნულ პოზიციაზე კონკურსი, ამ ეტაპზე უცნობია.

„საზოგადოებასთან ურთერთობის სპეციალისტმა დატოვა თანამდებობა. მიმდინარე კონკურსი რომ დასრულდება, ამის შემდეგ გამოვაცხადებთ ახალ კონკურსს“, – ამბობს ასპინძის მუნიციპალიტეტის გამგებლის მოადგილე ალექსანდრე პაპაშვილი.

[თინათინ ზაზაძე, ახალციხე]