სემინარი სტუდენტებთან ღია მმართველობის შესახებ

დღეს, 13 ოქტომბერს, სამცხე-ჯავახეთის სახელმწიფო უნივერსიტეტის სტუდენტებს ინფორმაციის თავისუფლების განვითარების ინსტიტუტის (IDFI) წარმომადგენლები „ღია მმართველობის პარტნიორობის“ (OGP) შესახებ ესაუბრნენ.

OGP საერთაშორისო ინიციატივაა, რომელიც 2011 წელს აშშ-სა და ბრაზილიის პრეზიდენტების ინიციატივით დაარსდა. პარტნიორობას საქართველო იმავე წელს შეუერთდა. დღეს OGP 65 ქვეყანას აერთიანებს.

სახელმწიფოები OGP-ის ფარგლებში შეიმუშავებენ სამოქმედო გეგმას, იღებენ ვალდებულებებს, რაც გარკვეული პერიოდის განმავლობაში უნდა შეასრულონ იმისათვის, რომ გაიზარდოს ხელისუფლების გამჭვირვალობა და საზოგადოების მიმართ ანგარიშვალდებულება.

მიმდინარე წელს საქართველომ მეორე სამოქმედო გეგმა წარადგინა. ქვეყანამ 2015 წლის ბოლომდე 27 ვალდებულება უნდა შეასრულოს. მათ შორისაა: პეტიციების ელექტრონული სისტემის შექმნა, ღია მონაცემების პორტალის www.data.gov.ge−ამოქმედება, საჯარო სამსახურში მიღების მიუკერძოებელი წესების შემუშავება, საჯარო მოხელეთა ქონებრივი დეკლარაციების მონიტორინგის სისტემის შექმნა, ფარული მიყურადების შესახებ სტატისტიკის გამოქვეყნება და სხვა.

ინფორმაციის თავისუფლების განვითარების ინსტიტუტის თავმჯდომარის ლევან ავალიშვილის თქმით, საქართველო ამ ვალდებულებას იღებს არა მხოლოდ საქართველოს მოსახლეობის, არამედ საერთაშორისო საზოგადოების წინაშეც: „წინა სამოქმედო გეგმაში 12 ვალდებულება იყო და მხოლოდ 4 შესრულდა. ახლა 27-ია გათვალისწინებული და 27-ვე გააზრებულად შეირჩა, ამიტომ დიდი იმედი მაქვს, რომ ყველას შევასრულებთ“.



[თამუნა უჩიძე, ახალციხე]