სამცხე-ჯავახეთის სახელმწიფო-სასწავლო უნივერსიტეტის ბიბლიოთეკის თანამშრომლები ხელფასის რაოდენობასა და ახლად განსაზღვრულ სტატუსს აპროტესტებენ. თუ აქამდე მათ სპეციალისტები ერქვათ, ახლა უმცროსი სპეციალისტები უწოდეს.
”გინახავთ სადმე სამსახური, სადაც ყველა უმცროსი სპეციალისტია?! - კითხულობს მადონა ბლუაშვილი, რომელსაც ბიბლიოთეკაში მუშაობის 41-წლიანი სტაჟი აქვს.
მისი თქმით, ძველი საშტატო განრიგის მიხედვით ახალციხის უნივერსიტეტის ყველა სპეციალისტს 400-ან 450 ლარი ეძლეოდა. ბიბლიოთეკაში სპეციალისტები კი 300 ლარს ღებულობდნენ, დაქვითვით 240-ს: ”როდესაც მოვითხოვეთ, რომ ხელფასი მოეცათ იმდენი, რამდენსაც სხვა სპეციალისტებს აძლევდნენ, თინა გელაშვილმა გვითხრა, გაჩუმდით თორემ სადაც ხართ, იქიდანაც წახვალთო”.
ბლუაშვილი ამბობს, რომ მაშინ გაჩუმდნენ, რადგან სხვა გზა არ ჰქონდათ: ”დიქტატურის პირობებში გაჩუმება ვარჩიეთ. ბიბლიოთეკაში ოთხი სპეციალისტი ვართ, ოთხივეს უკან ოჯახები დგას”.
სასწავლებლის რეორგანიზაციის შემდეგ (ახალციხის სახელმწიფო სასწავლო უნივერსიტეტისა და ახალქალაქის საგანმანათებლო კოლეჯის შეერთების შედეგად, ნოემბერში, სამცხე-ჯავახეთის სახელმწიფო სასწავლო უნივერსიტეტი ჩამოყალიბდა), ბიბლიოთეკის თანამშრომლები ელოდნენ, რომ მათი ხელფასი უნივერსიტეტში დასაქმებული სხვა სპეციალისტების ანაზღაურებას გაუთანაბრდებოდა.
”შედეგად მივიღეთ ის, რომ ადმინისტრაციის ხელმძღვანელმა ბიძინა მაისურაძემ განგვიცხადა, ახალი საშტატო განრიგი წაღებულია განათლების სამინისტროში და საბჭოს სხდომაზე ჯერ არ განხილულაო”, - გვითხრა ბლუაშვილმა.
ხელფასის გაეზრდის ნაცვლად, მათ თანამდებობას სახელი შეუცვალეს და უცმროსი სპეციალისტები უწოდეს.
”მაისურაძემ გვითხრა, გადავხედე საშტატო განრიგს, ძალიან ცუდად მომხვდა თვალში თქვენი ხელფასები, ამიტომ უმცროსი სპეციალისტები გაგხადეთო”, -ამბობს ბლუაშვილი.
მაისურაძე აცხადებს, რომ ცვლილების შესახებ ბიბლიოთეკის თანამშრომლებს ესაუბრა: ”ცუდია თუ მტკივნეულად აღიქვეს, რადგან ამის შესახებ უკვე ავუხსენი. დღეს ეტკინათ ეს საკითხი?!”
მისივე თქმით, ბიბლიოთეკის თანამშრომლებს ხელფასი 300 ლარი ჰქონდათ და დასახელებაში სპეციალისტი ეწერათ: ”სინამდვილეში, ჩვენთან სპეციალისტი ღებულობს 400 ლარს. აქ იყო რაღაც შეცდომა გაპარული, ეს ჩემი მუშაობის პერიოდს არ ეხება. ახლა მოხდა კორექტირება, ხელფასს შეესაბამა თანამდებობის დასახელება. დასახელება შეიცვალა, თორემ რა უფლება-მოვალეობებითაც სარგებლობდნენ, იგივე უფლება-მოვალეობებით სარგებლობენ და იგივე ხელფასს იღებენ”.
ბლუაშვილის განცხადებით, მათ სპეცილისტის თანამდებობზე კონკურსი აქვთ გავლილი: ”ამდენად, თვითნებურად ადმინისტრაციის მხრიდან ამგვარი ცვლილება დანაშაულია”.
მაისურაძის თქმით, ბიუჯეტი რომელიც სასწავლებლის რეორგანიზაციის შემდეგ თბილისში გაიგზავნა, მხოლოდ ერთი თვის შესახებაა: ”ახალი წლიდან აბსოლიტურად სხვა საშტატო განრიგი იქნება”.
ბლუაშვილი ამბობს, რომ ახალი საშტატო განრიგი რომელიც თბილისში გაგზავნეს გასაუდუმლოებულია: ”რეორგანიზაციის შემდეგ ეს განრიგი თბილისში ყველასგან ჩუმად წაიღეს”.
უნივერსიტეტის იურისტი თამუნა ჟუჟუნაძე გვიხსნის, რომ რადგან სასწავლებელი ახალი დაფუძნებულია, თავისთავად საჭიროა ახალი საშტატო განრიგისა და ბიუჯეტის დამტკიცება: ”საშტატო განრიგში პოზიციებს როგორ შეიტან, შენი გადასაწყვეტია და არ შეიძლება გაიგო როგორც დარღვევა, თუ ვიღაცისთვის სტატუსი მიუღებელია”.
მისი თქმით, თუ ახალი საშტატო განრიგით გათვალისწინებული სტატუსები თავისი თანამდებობრივი სარგოებით და უფლება-მოვალეობებით ვინმესთვის მიუღებელი იქნება, შეუძლია უარი თქვას დამსაქმებლის მიერ შეთავაზებულ პირობებზე და თავი შეიკავოს შრომით ურთიერთობებში შესვლაზე: ”ახალი განრიგის დამტკიცებმდე კი ყველა იმ სტატუსით რჩება, როგორც აქამდე იყო”.
რაც შეეხება იმას, რომ აქამდე ბიბლიოთეკაში სპეციალისტები კონკურსის წესით იყვნენ დანიშნულები და ახლა კი მათ უმცროსი სპეციალისტები უწოდეს, ჟუჟუნაძის განცხადებით კანონი არ დარღვეულა, რადგან ბიბლიოთეკის ყველა თანამშრომელს შრომით ხელშეკრულებაში ხელშეკრულების შეწყვეტის ერთ-ერთ მიზეზად სასწავლებლის რეორგანიზაციაც ეწერა.
ჟუჟუნაძის თქმით, არ შეიძლება შეცდომა ეწოდოს იმასაც, რომ აქამდე ბიბლიოთეკის სპეციალისტები 300 ლარს ღებულობდნენ, სხვა სპეციცლიასტებს კი 400 ლარი ჰქონდათ: ”სტატუსები შეიძლება ერთი და იგივე იყოს, მაგრამ, უფლება-მოვალობიდან გამომდინარე, ვიღაცა შეიძლება მეტად იყოს დატვირთული, ვიღაცა ნაკლებად”.
ბლუაშვილის თქმით, კი ”უნივერსიტეტი ბიბლიოთეკის მხრებზე დგას, ამდენად დატვირთვა დიდია. ჩვენ ოჯახები გვყავს. სპეციალისტების ხელა ხელფასი რომ მოეცათ ხმას არ ამოვიღებდით, მაგრამ ეს უსამართლობაა”.
[თამუნა უჩიძე, ახალციხე]