ამ ზამთარს მძღოლებს შიშის საფუძველი არ აქვთ

დილიდან ქალაქის ცენტრალურ ქუჩებზე ტექნიკურ მარილს ყრიან. მძღოლები ამბობენ, რომ პირველ თოვლს, გზებზე შეფერხება არ გამოუწვევია.

”ქალაქში დილიდან ვმოძრაობ, ქუჩებში ყველგან მარილს ყრიან და არსად შეფერხება არ არის, თუ ასე გააგრძელეს, ზამთრის აღარ შეგვეშინდება”,-ამბობს ტაქსის მძღოლი გოგი მოთიაშვილი.



მუნიციპალიტეტის შიდა გზების მოვლა შენახვისთვის 2012 წლის ადგილობრივ ბიუჯეტში, 207 ათასი ლარია გათვალისწინებული. ქალაქში უსაფრთხო გადაადგილებას ტენდერში გამარჯვებული ფირმა შპს ”ოცხე” უზრუნველყოფს. ხელშეკრულების თანახმად, ანაზღაურება შესრულებული სამუშაოების მიხედვით განხორციელდება. ამ დროისათვის შესრულებული სამუშაოები 70 ათას ლარის ღირებულებისაა.

ახალციხის მუნიციპალიტეტის გამგეობის საფინანსო - საბიუჯეტო სამსახურში ამბობენ, რომ შიდა გზების მოვლა-შენახვისათვის მომავალ წელს შედარებით ნაკლები თანხა გამოიყოფა.

”წინა ხელშეკრულებიდან, რადგან თანხა სრულად ათვისებული არ იქნა, მომავალი წლის ბიუჯეტისთვის 150 ათასი ლარის ფარგლებშია გათვალისწინებული, რაც ჩემი აზრით სრულიად საკმარისია ასეთი სახის სამუშაოებისთვის”.-განმარტავს საფინანსო საბიუჯეტო სამსახურის უფროსი გაგა ივანიძე.



[თინათინ ზაზაძე, ახალციხე]