ბარ ‘არდაჰანში’ დაკავებული 8 ქალი გაათავისუფლეს

საქართველოს შინაგან საქმეთა სამინისტროს ინფორმაციით, ბარ“ არდაჰანში“ დაკავებული 8 ქალი, რომლებსაც ახალციხის რაიონულმა სასამართლომ 2 დღიანი ადმინისტრაციული პატიმრობა შეუფარდა, გათავისუფლდა. ამავე დაწესებულებაში, ქალებთან ერთად დაკავებული ერთი კაცი კი კვლავ პატიმრობაში რჩება.

შეგახსენებთ, „არდაჰანში“ პოლიცია 6 აპრილს, ღამით შევიდა. იმ დროს ბარში 20–მდე ქალი და თურქეთის რამდენიმე მოქალაქე იყო. სამართალდამცველებმა ყველა მათგანი ჯერ გაჩხრიკეს, შემდეგ კი რაიონული სამმართველოს შენობაში გადაიყვანეს. სამმართველოს შენობა თორმეტმა ქალმა გამთენიისას, 04:30 საათზე დატოვა. 8 ქალი და 2 კაცი კი შენობაში დარჩნენ. ათივე მათგანის წინააღმდეგ პოლიციამ საქმე ადმინისტრაციულ სამართალდარღვევათა კოდექსის 173–ე მუხლით აღძრა, რაც პოლიციელისადმი დაუმორჩილებლობას გულისხმობს. 3 მათგანს კი 166–ე მუხლს, წვრილმან ხულიგნობას ედავებოდნენ.

მეორე დღეს, 7 აპრილს, ახალციხის რაიონული სასამართლოს გადაწყვეტილებით, რვა ქალს 2–დღიანი ადმინისტრაციული პატიმრობა შეეფარდა, ორი კაციდან ერთს 250–ლარიანი ჯარიმა დააკისრეს, ერთი კი ადმინისტრაციულ პატიმრობაში 7 დღით გაუშვეს.

შსს–ს ოფიციალური ინფორმაციით, იმ დღეს სამართალდამცველები ბარში ოპერატიული ინფორმაციის საფუძველზე, ნარკოტიკის ამოსაღებად შევიდნენ. მათივე ცნობით, პოლიციამ ‘არდაჰანიდან’ აბები ამოიღო და ექსპერტიზაზე გააგზავნა. ექსპერტიზის პასუხი, არის თუ არა ნარკოტიკული ნივთიერების შემცველი აბები, ჯერ უცნობია. ამ საქმეს შსს 260–ე მუხლით იძიებს, რაც ნარკოტიკული საშუალების უკანონო შეძენა, შენახვას ან გასაღებას გულისხმობს.

[ვარლამ წიკლაური, ახალციხე]