პანკისის ხეობაში ჰესის მშენებლობის დაწყებას მოსახლეობის პოლიციასთან დაპირისპირება მოჰყვა

სოფელ ბირკიანში აქციის მონაწილეებსა და პოლიციას შორის დაპირისპირება მოხდა. სპეცრაზმმა აქციის მონაწილეების წინააღმდეგ ცრემლსადენი გაზი და რეზინის ტყვიები გამოიყენა. დაშავებულები არიან როგორც სპეციალური რაზმის წარმომადგენლები ასევე ადგილობრივები. დალეწილია შს სამინისტროს ტექნიკა და ერთ მანქანას ცეცხლიც გაუკიდეს.

აქ მცხოვრებლები ამბობენ, ჰესების, კერძოდ მდინარე ალაზანზე "ხადორი 3"-ის მშენებლობის გაგრძელების უფლებას არავის მისცემენ.

გრძელდება ასობით ადამიანის პროტესტი, კვლავ მობილიზებულია სპეცრაზმი და პოლიციის ტექნიკა, მათ შორის წყლის სატყორცნი მანქანები.

არასამთავრობო ორგანიზაციები შინაგან საქმეთა სამინისტროს მოუწოდებენ, დაუყოვნებლივ გაიყვანოს სპეციალური დანიშნულების რაზმი პანკისის ხეობიდან, სადაც ასობით დემონსტრანტი გამოვიდა „ხადორი 3“ ჰესის მშენებლობის დაწყების წინააღმდეგ. ამასთან, ისინი გადადგომისკენ მოუწოდებენ ეკონომიკის ახლადდანიშნულ მინისტრს, ნათია თურნავას.

ორგანიზაციები, „ადამიანის უფლებების სწავლებისა და მონიტორინგის ცენტრი“ (EMC), „საქართველოს ახალგაზრდა იურისტთა ასოციაცია“ და „მწვანე ალტერნატივა“ მოუწოდებენ:

საქართველოს შინაგან საქმეთა სამინისტროს, დაუყოვნებლივ შეწყვიტოს საპოლიციო ძალისგამოყენება პანკისის ხეობაში და გამოიყვანოს ხეობაში შეყვანილი დამატებითი ძალები.

დაუყოვნებლივ გადადგეს ეკონომიკისა დამდგრადი განვითარების მინისტი ნათია თურნავა, რომელსაც აშკარა ინტერესთა კონფლიქტი აქვს ბიზნეს ინტერესებსა და სახელმწიფო ინტერესებს შორის და მისი დანიშვნიდან პირველივე დღეებში კრიზისი შექმნა პანკისის ხეობაში.

პროკურატურამ დაუყოვნებლივ დაიწყოს გამოძიება პანკისის ხეობაში მიმდინარემოვლენებთან დაკავშირებით, ძალაუფლების სავარაუდო გადამეტების გამოძიების მიზნით.

პარლამენტი დაინტერესდეს აღნიშნული თემით და გამოიყენოს საზედამხედველო მექანიზმები ადგილობრივი მოსახლეობის ინტერესებისა და უფლებების დაცვისთვის;

დონორი ორგანიზაციები, ევროკავშირის წევრი ქვეყნები დაინტერესდნენ მათი ფინანსური დახმარებით მიმდინარე ენერგეტიკული პროექტების სავალალო გარემოსდაცვითი და სოციალური შედეგებით, რომლებიც განხორციელდა და ხორციელდება ევროკავშირისა და საერთაშორისო საფინანსო ინსტიტუტების პოლიტიკების უგულებელყოფით.

[sknews.ge]