რას ასწავლიან ახალციხის სასულიერო სემინარიაში

ალექსანდრე გვირჯიშვილი ახალშენის ტერიტორიაზე მდებარე წმინდა გიორგის სახელობის ტაძრისთვის სატრაპეზოს აკეთებს. ეს მისი სადიპლომო ნამუშევარი იქნება.

„იდუმალის ტერიტორიაზე ახალშენის ტაძარში წირვა–ლოცვა ვერ მიმდინარეობს, ამიტომ მინდა ეს სატრაპეზო ამ ტაძარს შევწირო“, – გვეუბნება ალექსანდრე.

იგი სასულიერო სემინარიის მესამე კურსის სტუდენტია და ახლა სწორედ ბოლო ეტაპს გადის, სადიპლომოს მზადებაშია.

ალექსანდრეს მსგავსად, ახალციხისა და ტაო–კლარჯეთის, გრიგოლ ხანძთელის სახელობის სასულიერო სემინარიაში 25 ახალგაზრდა სწავლობს, როგორც ვაჟები, ასევე გოგონები. მათ შორის ერთი შეზღუდული შესაძლებლობების მქონე პირია. სემინარია 2008 წლიდან არსებობს. მისი რექტორი ახალციხისა და ტაო–კლარჯეთის მიტროპოლიტი მეუფე თეოდორეა. სემინარიაში სწავლება სამ წლიანია.

ხატწერის პედაგოგი ბექა კოპაძე გვიხნის, რომ სემინარიის სტუდენტები სწავლობენ თეორიულ საგნებსაც და პრაქტიკულსაც: „სწავლობენ ხატწერას, მინანქარს, ხეზე და ქვაზე კვეთას, თექაზე მუშაობას, ქარგვას, გობელენისა და ხალიჩის ქსოვას. ასევე, გალობას, კალიგრაფიასა და თეორიულ საგნებს“.



სემინარიის სტუდენტები პირველ სასწავლო წელს ყველა საგანს გადიან, მეორე წელს მხოლოდ იმას რაც უკეთ გამოსდით, მესამე წელს კი სადიპლომოსთვის ემზადებიან.

სემინარიაში 6 პედაგოგი და 2 სასულიერო პირი მუშაობს. ბექა კოპაძის განმარტებით, სასულიერო პირები თეორიულ ნაწილს, კერძოდ, ქართულ ენასა და ლიტერატურას ასწავლიან.

სწავლის დამთავრების შემდეგ სტუდენტები სპეციალურ დიპლომებს იღებენ. მათ ნაწილს თავად სასწავლებელი ასაქმებს, ახალგაზრდები სარესტავრაციო სამუშაოებზე მუშაობენ. ნაწილი კი კერძო შეკვეთებზე მუშაობს.

სემინარიაში სწავლა უფასოა. აქ გაკვეთილები ყოველდღე ტარდება. დრო მოსწავლეებზეა მორგებული, – ისინი, ვინც სხვაგან სწავლობენ, სემინარიაში დღის მეორე ნახევარში მიდიან.

სემინარიაში სწავლა ზაფხულში, ივლისის ბოლოს, აგვისტოს დასაწყისში იწყება. სწავლის მსურველები გაბარებენ გამოცდას ხატვაში და გადიან გასაუბრებას მეუფე თეოდორესთან. სემინარიაში მოსახვედრად პირადობის დამადასტურებელი საბუთისა და სრული ზოგადი განათლების ატესტატის ასლია საჭირო. გარდა ამისა, აუცილებელია პირადი მოძღვარის რეკომენდაცია.

ბექა კოპაძე ამბობს, რომ ასაკობრივი შეზღუდვა არაა, მთავარია მსურველს სრული ზოგადი განათლება ჰქონდეს მიღებული.



[ნათია გულიაშვილი, ახალციხე]