კოალიციამ მხარი დაუჭირა ინიციატივას, კონსტიტუციაში ჩაიწეროს, რომ ქორწინება ქალისა და მამაკაცის ერთობაა

„კოალიცია „ქართული ოცნების“ პოლიტსაბჭოს დღევანდელ სხდომაზე განხილულ საკითხთა შორის ერთ-ერთი უმთავრესია - ინიცირება საკონსტიტუციო ცვლილებისა, რომელიც ქორწინების, როგორც ქალისა და მამაკაცის ერთობის, სამოქალაქო კოდექსში არსებული განმარტების საკონსტიტუციო დონეზე გამყარებას გულისხმობს", – განაცხადა საქართველოს პრემიერ – მინისტრმა გიორგი კვირიკაშვილმა.

მისი განცხადებით, პოლიტსაბჭომ საკონსტიტუციო ცვლილების ინიცირების პროცესის დაწყებას მხარი დაუჭირა. „რესპუბლიკურმა პარტიამ“ დააფიქსირა განსხვავებული პოზიცია, რაც ეხება არა საკითხის შინაარსს, არამედ - მისი განხორციელების გზებსა და საშუალებებს.

ამასთანავე, საზოგადოებისთვის ცნობილია, რომ კოალიცია „ქართულმა ოცნებამ“ ცოტა ხნის წინ გააკეთა მნიშვნელოვანი განაცხადი, რომ დისკრიმინაციის ყველა ფორმის წინააღმდეგია, რაც გამყარდა კიდეც შესაბამისი კანონმდებლობის მიღებით.

ჩვენ, კიდევ ერთხელ, ხაზგასმით, ერთხმად გიდასტურებთ კოალიციის ერთგულებას პრინციპისადმი, რაც გულისხმობს დისკრიმინაციის ყველა ფორმის მიურებლობას და აღკვეთას და ამავდროულად გამოვდივართ ინიციატივით, რომ ისეთი მნიშვნელოვანი ფასეულობის დაცვა, როგორიცაა ქორწინება, გარანტირებული იყოს ქვეყნის მთავარი კანონის - კონსტიტუციის დონეზე“, – განაცხადა პრემიერმა პოლიტსაბჭოს სხდომის დასრულების შემდეგ.

[ნინო ნარიმანიშვილი, ახალციხე]