რას ფიქრობენ სამცხე–ჯავახეთში NGO-ები ქორწინების კონსტიტუციით დაკანონებაზე

კოალიცია "ქართული ოცნების" პოლიტსაბჭომ 7 მარტს, სხდომაზე მხარი დაუჭერა ინიციატივას, რომ კონსტიტუციაში ქორწინება ქალის და მამაკაცის ერთობად განისაზღვროს.

ამ მოსაზრებას რეგიონში არსებული არასამთავრობო ორგანიზაციების წარმომადგენლები სხვადასხვაგვარად აფასებენ.

„კონსტიტუციაში ეს დიდი ხნის წინ უნდა ჩაწერილიყო. მორალურად სულაც არ მჭირდება მაგის ქვეყნის მთავარ კანონში განმარტება, მაგრამ დღეს ეს საჭიროებამ მოითხოვა და ვეთანხმები. თუ ამას კონსტიტუციაში ჩავწერთ, ვიღაცეებს ამ საკითხებზე სხვა თემების აგორების საშუალებას აღარ მივცემთ“, – ამბობს ადიგენში მოქმედი არასამთავრობო ორგანიზაცია „საზოგადოებრივი დარბაზის“ ხელძღვანელი გოდერძი კუბლაშვილი.

მას ეთანხმება ახალქალაქში „სამოქალაქო კულტურის საერთაშორისო ცენტრის“ ექსპერტი მახარე მაცუკატოვი: „ბიოლოგიურადაც ეგრეა და კონსიტუტციაშიც თუ ჩაიწერება კარგი იქნება. მართალია, თანასწორობაზეც საუბრობენ, მაგრამ ამის კონსტიტუციაში ჩაწერა უკეთესია“.

მაცუკატოვისა და კუბლაშვილის პოზიციას იზიარებს „ახალციხის ახალგაზრდული ცენტრის“ ხელმძღვანელი მარინე სუდაძე: „მივესალმები თუ კონსტიტუცაიში ამას ჩაწერენ. ნამდვილად, მხოლოდ მამაკაცისა და ქალის ერთობაა ქორწინება“.

იგივეს აცხადებს „სამცხე-ჯავახეთის დემოკრატ ქალთა საზოგადოების“ თავმჯდომარე მარინა მოდებაძე: „ქორწინება მხოლოდ ქალისა და მამაკაცის ურთიერთკავშირია. არ ვარ მომხრე ერთსექსიანთა ქორწინების“.

„სამოქალაქო საზოგადოების ფორმირების ხელშემწყობი ცენტრის“ წარმომადგენელი ნინო რუხაძე ამბობს, რომ დისკრიმინაციის მომხრე არ არის: „თუმცა, რადიკალურად განწყობილი არ ვარ და არ ვაცხადებ, რომ უნდა ჩაიწეროს, ან არ უნდა ჩაიწეროს. ზოგადად, ადამიანების თავისუფალი არჩევანის მომხრე ვარ“.

ასოციაცი „ტოლერანტის“ ხელმძღვანელი მესხიშვილი ფიქრობს, რომ ის, რა ინიციატივასაც მხარი კოალიციამ დაუჭირა, კანონში უკვე წერია და ამის კონსტიტუციაში ხაზგასმა საჭირო აღარ არის: „საქართველო არ არის ჯერ მზად იმითვის, რომ ერთსქესიანთა ქორწინება მივიღოთ. უბრალოდ ვერ ვხვდები, ამის კონსტიტუციაში ჩაწერა რა აუცილებელია“.

ამ ჩანაწერის კონსტიტუციაში შეტანის ლოგიკას ვერ ხედავს „დემოკრატ მესხთა კავშირის“ დირექტორი გიორგი ანდღულაძე: „თუ ამას იმისთვის აკეთებენ, რომ ერთსქესიანთა ქორწინება აიცილონ მომავალში თავიდან, მოვა სხვა პარლამენტი და ამოიღებს ამ მუხლს კონსტიტუციიდან. მგონია ეს ელექტორატის გარკვეული ნაწილის გულისმოსაგებადაა გაკეთბული, თუმცა ამაში რაიმე ზიანს ან სარგებელს ვერ ვხედავ“.

„საზოგადოებრივი განვითარების ახალციხის ცენტრის“ ხელმძღვანელი ნუგზარ თათეშვილი აცხადებს, რომ ასეთი სიხშირით კონსტიტუციაში ცვლილებების შეტანა არ შეიძლება: „მაშინ ჩავწეროთ ისცი, რომ ორჯერ ორი ოთხია, ჩვენ ხომ გვჯერა ამის ყველას?! თუ აქამდე ასეთი ჩანაწერი არ იყო, მაშინ რა, მოხდა ისეთი ქორწინება რასაც უფრთხიან?! დაცულობას განაპირობებს სოცილაური შეგნება, ანუ ზნეობრივი სიმაღლე და არა კონსტიტუციაში რა გვიწერია“.

შეგახსენებთ, რომ პოლიტსაბჭოს სხდომა გუშინ, 7 მარტს გაიმართა. სხდომის დასრულების შემდეგ პრემიერ მინისტრმა გიორგი კვირიკაშვილმა განაცხადა: „დისკრიმინაციის ყველა ფორმას ვგმობთ და ამავდროულად გამოვდივართ ინიციატივით, რომ ისეთი მნიშვნელოვანი ფასეულობის დაცვა, როგორიცაა ქორწინება, გარანტირებული იყოს ქვეყნის მთავარი კანონის - კონსტიტუციის დონეზე“.

[თამუნა უჩიძე, ახალციხე]