რას პასუხობს აკაკი მაჭუტაძე ტარიელ ნაკაიძის ბრალდებას

4 მარტს, ბათუმში გამართულ მუსლიმების გამაფრთხილებელ აქციაზე, ქართველ მუსლიმთა კავშირის თავმჯდომარემ ტარიელ ნაკაიძემ ბოლო დროს ადიგენში არსებული რელიგიური კონფლიქტების პროვოცირებაში სამცხე–ჯავახეთის გუბერნატორი აკაკი მაჭუტაძე დაადანაშაულა.

„ერთ–ერთი საკითხი ადიგენის გამგებლისა და რეგიონის გუბერნატორისთვის პასუხისმგებლობის დაკისრებაა, ორივე მათგანი სისტემატურად ერთვება მსგავს მანიპულაციებში და ხშირად ასეთი შემთხვევები ინიცირებულია მათ მიერ. ყველა ბოლო დროს მომხდარი ინციდენტი მათ უკავშირდება“, – განაცხადა ნაკაიძემ.

სამცხე–ჯავახეთის გუბერნატორი, აკაკი მაჭუტაძე ამბობს, რომ ნაკაიძის განცხადება აბსურდულია. მისი თქმით, ის, ვინც მას რაიმე ნიშნით სოფელში მომხდარ რელიგიურ დაპირისპირებაში ადანაშაულებს, ცრუობს.

„ეს არის მტკნარი სიცრუე, მსგავს ფაქტს ჩემი მხრიდან ადგილი არ ჰქონია“, – ირწმუნება გუბერნატორი.

აკაკი მაჭუტაძე ამბობს, რომ სოფელ ადიგენში რელიგიურ დაპირისპირების მოგვარებაში უშუალოდ ჩაერთო და ერთ–ერთი იყო მათ შორის, ვინც დაპირისპირებების შემდეგ მოლაპარაკების მაგიდასთან იჯდა. მეტიც, მაჭუტაძე ირწმუნება, რომ მზადაა „სამხრეთის კარიბჭესთან“ ერთად ეწვიოს ადიგენს და დაელაპარაკოს თითოეულ მცხოვრებს, მუსლიმსაც და ქრისტიანსაც.

„გავესაუბრები ყველას, ვინც კონფლიქტის მაპროვოცირებლობას მაბრალებს“, – აცხადებს გუბერნატორი.

[ვარლამ წიკლაური, ადიგენი]