ბაქო-თბილისი-ყარსის სარკინიგზო მაგისტრალს სამი ქვეყნის საგარეო საქმეთა მინისტრი სტუმრობდა

მაგისტრალის ქართულ მონაკვეთზე მიმდინარე სამუშაოები და ინფრასტრუქტურა კოლეგებს საქართველოს საგარეო საქმეთა მინისტრმა მიხეილ ჯანელიძემ დაათვალიერებინა.

სამივე ქვეყნის საგარეო უწყების ხელმძღვანელთა შეფასებით, ეს ისტორიული მნიშვნელობის პროექტია, რომლის ფარგლებშიც აზიისა და ევროპის კონტინენტები ერთმანეთს დაუკავშირდება.

მიხეილ ჯანელიძის განცხადებით, ბაქო-თბილისი-ყარსის რკინიგზის ამოქმედება მნიშვნელოვნად გაზრდის სატრანსპორტო დერეფნის კონკურენტუნარიანობას, ხელს შეუწყობს ტვირთების მოზიდვას და აბრეშუმის გზის პროექტის რეალიზაციას.

„სამი ქვეყანა ძალიან დიდ რესურსს ვხარჯავთ იმისთვის, რომ ამ პროექტმა შეძლოს ახალი სინერგიის მოტანა რეგიონთაშორისი ურთიერთობების განვითარებისთვის. ეს მნიშვნელოვანია ჩვენი ქვეყნების განვითარებისთვის. მხოლოდ საქართველოს მონაკვეთზე 700 მილიონზე მეტი დაიხარჯა და როდესაც დამთავრდება ეს პროექტი, მას 1400 კაცზე მეტი ადამიანი მოემსახურება, შეიქმნება დამატებითი სამუშაო ადგილები. ეს ნამდვილად იქნება ისტორიული მნიშვნელობის გზა და ვიმედოვნებთ, რომ ძალიან მალე ვიხილავთ პირველ გადაზიდულ ტვირთს ამ მონაკვეთებზე"- განაცხადა მიხეილ ჯანელიძემ.

თურქეთის საგარეო საქმეთა მინისტრის განცხადებით, პროექტს დიდი მნიშვნელობა აქვს, რადგან ხდება აბრეშუმის გზის აღდგენა.

„ეს პროექტი მნიშვნელოვანია როგორც დიდი ბრიტანეთისთვის და ჩინეთისთვის, ასევე ევროპისა და აზიისთვის, რადგან ხდება აბრეშუმის გზის აღდგენა, რომლის ფარგლებშიც მოხდება ლონდონისა და პეკინის ერთმანეთთან დაკავშირება" - განაცხადა თურქეთის საგარეო საქმეთა მინისტრმა მევლუთ ჩავუშოღლუმ.

აზერბაიჯანის საგარეო საქმეთა მინისტრმა იმედი გამოთქვა, რომ მიმდინარე წლის ბოლოს გზის გამოყენება შესაძლებელი იქნება.

"ჩვენი აქ სტუმრობა კარგი ინიციატივაა, ჩემი თვალით ვხედავ, რომ ვასრულებთ იმ დიდი გზის მშენებლობას, რომლის განხორციელების იდეაც 7 წლის წინ გაჩნდა. ჩვენ ვიმედოვნებთ, რომ მიმდინარე წლის ბოლოს გამოვიყენებთ გზას, საქართველოსა და თურქეთის ტერიტორიების გავლით, რომელიც იქნება წარმატებული მთლიანად რეგიონისთვის", - განაცხადა აზერბაიჯანის საგარეო უწყების ხელმძღვანელმა ელმარ მამედიაროვმა.

[ნინო ნარიმანიშვილი, ახალციხე]