ახალციხეში ალილოს მსვლელობა მოეწყო

სასულიერო პირებმა მრევლთან და მგალობელთა გუნდთან ერთად ალილოს მსვლელობა ახალციხის მაცხოვრის ამაღლების სახელობის ტაძრიდან დაიწყეს. ალილოს მონაწილეები მოსახლეობას შობის ბრწყინვალე დღესასწაულს გალობით ულოცავდნენ.

მსვლელობის დაწყებამდე ახალციხისა და ტაო–კლარჯეთის მიტროპოლიტმა თეოდორემ შეკრებილ მრევლს შობის ბრწყინვალე დღესასწაული მიულოცა და დღევანდელი დღის მნიშვნელობაზე ესაუბრა.

„ძირძველი მესხეთიდან გილოცავთ ამ დღეს. ვადიდოთ უფალი ისე, როგორც მწყემსები ადიდებდნენ მის შობას. ჩვენ სიხარულით აღვნიშნავთ ამ დღეს. გისურვებთ მშვიდობას და კეთილდღეობას“, – განაცხადა ახალციხისა და ტაო–კლარჯეთის მიტროპოლიტმა თეოდორემ.

ალილოს მსვლელობა ქალაქში ორ საათს გაგრძელდა. მსვლეობისას შეწირულ ტკბილეულს, ტანსაცმელს და საყოფაცხოვრებო ნივთებს, კი მიუსაფარ ბავშვთა სახლებს, შეჭირვებულ ოჯახებსა და მოხუცებულებს გადასცემენ.

ცნობისთვის, საქართველოში ალილოს ტრადიციას მრავალწლიანი ისტორია აქვს.

ქრისტეს შობის დღესასწაულზე ალილოს საზეიმო მსვლელობა სრულიად საქართველოს კათოლიკოს–პატრიარქის, ილია მეორის ლოცვა-კურთხევით მეთოთხმეტე წელია ეწყობა.

[ვარლამ წიკლაური, ახალციხე]