საშობაო ალილოს მსვლელობა ახალციხეში [Photo]

საშობაო ალილოს მსვლელობა ახალციხეში თამარაშვილის ქუჩიდან დაწიყო. საზეიმო მსვლელობას ივლიტის ღვთისმშობლის სახელობის ტაძრის დეკანოზი იოანე გელაშვილი უძღვება. მასთან ერთად მგალობლები, თოვლის ბაბუა და ბავშვები ქალაქის ცენტრალურ ქუჩებს გაივლიან.

„გზადაგზა ვინც რას გვაძლევს ვაგროვებთ, ზოგი პროდუქტს, ზოგი სათამაშოებს, ზოგი ტანსაცმელს ზოგიც კი ფულს წირავს“, – ამბობს დეკანოზი იოანე.

ალილოს მსვლელობის მონაწილეები საჩუქრებს თავადაც არიგებენ. თოვლის ბაბუა ხალხს ჯვრებს, სანთლებსა და ხატებს ჩუქნის.
ყოველ წელს ალილოში ახალციხის ადგილობრივი თივთმმართველობაც ერთვება. ქალაქის ადმინისტრაციულ შენობასთან ურემი ტკბილეულით, სხვადასხვა პროდუქტებითა და ტანსაცმლით იტვირთება.

„თანამშრომლები ყოველ წელს ალილოსთვის ვაგროვებთ შესაწირს და მსვლელობაში მონაწილეობას ვიღებთ. ბიუჯეტიდან ამისთვის არაფერი იხარჯება“, – გვითხრეს ახალციხის მერიის საზოგადოებასთან ურთიერთობის სამსახურში.

შეგროვილ საჩუქრებს ალილოს მონაწილეები ნინოწმინდის ბავშვთა სახლში მიიტანენ.

როგორც დეკანოზი იოანე ამბობს, ალილოს მსვლელობა ახალციხეში მეთორმეტე წელია რაც იმართება. საქართველოში კი ალილოს ტრადიცია V-VI საუკუნიდან იღებს სათავეს.



















[თამუნა უჩიძე, ახალციხე]