ახალციხეში პარკინგის მოწესრიგებას ცდილობენ

გზის სავალი ნაწილები, პარკირების ადგილები და ფეხით მოსიარულეთა გადასასვლელები ახალციხეში შპს „გზაჯვარედინმა“ დახაზა. მონიშნულია პარკინგის ადგილები შეზღუდული შესაძლებლობების მქონე პირებისთვისაც.

ასე ახალციხის მერია ქალაქში მოძრაობის მოწესრიგებას გეგმავს. ქალაქში მომრავლებული ავტომანქანების გამო, გარდა იმისა, რომ დილისა და შუადღის საათებში სკოლების მიმდებარე ტერიტორიებზე (და არამხოლოდ) საცობებია, ქალაქის ცენტრალურ ნაწილში შეუძლებელია მანქანის გაჩერებაც.
ახალციხის მერიაში პარკინგის მოწესრიგებაზე საუბარი დიდი ხნის წინ დაიწყეს. საკითხები უფრო დაკონკრეტდა ზაფხულში, მას შემდეგ, რაც ააიპ „ახალციხის ტბა“ დაფუძნდა. მაშინ მერიაში ამბობდნენ, რომ ამ ააიპ–ს დაევალებოდა პარკინგის მართვაც.

„დაიხაზება თუ არა კონკრეტული ტერიტორიები, პრობლემა მოგვარდება. ყველგან დაიხაზება, კონკრეტულად სად, რამდენ პროცენტზე და რამდენ გრადუსზე უნდა დადგეს ავტომობილი. პარკინგის სისტემა განსხვავებული იქნება მოქალაქებიისთვის, სამარშუტო ტაქსებისთვის და სხვადასხვა სახის ტრანსპორტისთვის", – განაცხადა „სამხრეთის კარიბჭესთან“ მერის მოადგილემ ზაზა გელაძემ 2015 წლის ივლისში.
პარკირება ფასიანი რომ იქნება, ამას ახალციხის მერიაში ახლაც ადასტურებენ, თუმცა, როდიდან ამოქმედდება და როგორი იქნება გადახდის სისტემა, ჯერ გარკვეული არაა.

„სავარაუდოდ მომავალ წელს გახდება ფასიანი. ჯერ არ არის გადაწყვეტილი, რომელი ააიპ–ი უხელმძღვანელებს, არც პერსონალია აყვანილი“, – ამბობს მერიის ადმინისტრაციის საორგანიზაციო განყოფილების უფროსი ეკა ბერიძე.

[თინათინ ზაზაძე, ახალციხე]