ნაგავმზიდებისთვის პარკინგის მშენებლობა 55.000 ლარამდე დაჯდება

როგორც ახალციხის მერიაში გვიხსნიან, ე.წ. „საქმიანი ეზოს“ მოწყობა, სახანძრო–სამაშველო სამსახურის უკან იგეგმება.

„კეთილმოწყობის ყველა სატრანსპორტო საშუალება იქ განთავსდება. ამ მოედნის მოწყობა 51–დან 55–ათას ლარამდე დაგვიჯდება და თანხა ადგილობრივი ბიუჯეტიდან გამოიყოფა“, – ამბობს ახალციხის მერი ვლადიმერ ზედგინიძე.

შპს „ახალციხის კეთილმწოყობის“ დირექტორის დროებით მოვალეობის შემსრულებლის გიორგი ლონდარიძის თქმთ, ამ დროისთვის სამსახურს 11 სატრანსპორტო საშუალება ჰყავს: „აქამდე მანქანები ხან სტადიონის მიმდებარე ტერიტორიაზე გვეყენა, ხან მძღოლებს მიჰყავდათ და თავიანთ ეზოებთან აჩერებდნენ. კარგია, რომ ეს პრობლემა მოგვარდება“.

შეგახსენებთ, რომ მერიამ ადგილი პარკინგისთვის მიმდინარე წლის იანვრის ბოლოს მოიძია. ამ დრომდე კი ნაგავმზიდების „არაფორმალური“ სადგომი, ქალაქის ქუჩებია.

[თამუნა უჩიძე, ახალიცხე]