„ხმა ამოიღეთ!“ – ახალციხეში ქალთა და გოგონათა ძალადობაზე იმსჯელეს

ახალციხეში ადმინისტრაციულ შენობაში ფილმის „ხმა ამოიღეთ!“ ჩვენება გაიმართა. 45–წუთიან ფილმში ძალადობის მსხვერპლი ქალები ტრაგიკული ისტორიების შესახებ ყვებიან. თუმცა, ამავე ფილმში ნაჩვენებია ისიც, თუ როგორ არ სურთ ქალებს ოჯახური ძალადობის შესახებ ხმამაღლა ისაუბრონ, როგორ აგრძელებენ მოძალადესთან ერთად, ერთ ჭერქვეშ ცხვორებას და ამას შვილების ფაქტორით, ან სხვა მიზეზით ხსნიან.

ფილმის ჩვენებას ადგილობრივი თვითმმართველობის, სამხარეო ადმინისტრაციის, არასამთავრობო ორგანიზაციებისა და მედიის წარმომადგენლები ესწრებოდნენ. მათ ფილმის დასრულების შემდეგ დარბაზში დისკუსია გამართეს.



განსაკუთრებული აქცენტი იმაზე გაკეთდა, რომ ფილმში რესპონდენტების უმრავლესობა ნაადრევ ასაკში გათხოვილია.

„ძალიან საინტერესო ფილმი იყო, ის დღვანდელ რეალობას ასახავს. ადრეულ ასაკში ქორწინება, რაც თითქოს დემოგრაფიულ ვითარებას აუმჯობესებს, ქალს ხშირ შემთხვევაში ძალადობის მსხვერპლს ხდის“, – ამბობს სამცხე–ჯავახეთის სამხარეო ადმინისტრაციაში ადგილობრივი თვითმმართველობის ორგანოებთან ურთიერთობის სამსახურის უფროსი ქეთევან მიშველიძე.

იგი ნაადრევ ქორწინებასთან დაკავშირებით კანონის გამკაცრებას დადებითად აფასებს: „ეს სრულად ვერ შეცვლის დამოკიდებულებებს, თუმცა წინ გადადგმული ნაბიჯი ნადვილად იქნება. ამ პრობლემების მოგვარებას კომპლექსური მიდგომა სჭირდება“.

მიშეველიძეს ეთანხმება ახალციხის მუნიციპალიტეტის გამგებლის მოადგილე კარლენ მანასიანი: ადრეულ ასაკში გოგონები ოჯახიდან ძალადობას გაურბიან, იქ არსებულ პრობლემებთანე რთად ცხვორება არ სურთ, მაგრამ რომ თხოვდებიან იქაც იგივე ვთარებაში უხდებათ ცხოვრება. მხოლოდ კანონმდებლობა ამ კუთხით ვერაფერს შეცვლის თუ მენტალიტეტიც არ შეიცვალა“.

შეხვედრის ორგანიზატორი,"მერსი ქორფსის" "მცირე კავკასიის ალიანსების პროგრამის" გენდერისა და მმართველობის კონსულტანტი ნინო რუხაძე აცხადებს,რომ საზოგადოებას ცნობიერების ამაღლება სჭრიდება: „ამგვარი დისკუსიებთ ალბათ ამას შევუწყობთ ხელს. ასეთი შეხვედრებით ალბათ უფრო მეტი ადამიანი იფიქრებს ასეთ პრობლემებსა და მათ მოგვარებაზე. თუ აქამდე არავინ იღებდა ხმას ასეთ თემებზე, ამის შემდეგ ვფიქრობ, მეტი სტიმული მიეცემათ ადამიანებს რომ ხმა ამოიღონ“.

დისკუსიის დასრულების შემდეგ მონაწილეები შეუერთდნენ აქციას „ფორთოხლისფერი მსოფლიო“. მათ დაურიგდათ A5 ფორმატის ცარიელები ფურცლები, საღებავები და მარკერები. ფურცლებზე თითოეულმა მათგანმა საკუთარი პოზიცია დაწერა, საღებავის საშუალებით კი მასზე საკუთარი ხელის ანაბეჭდი დააფიქსირა.

ღონისძიება გაიმართა ქალთა და გოგონათა მიმართ ძალადობის წინააღმდეგ დაწყებული 16–დღიანი კამპანიის ფარგლებში – „ფორთოხლისფერი მსოფლიო - შეწყვიტე ძალადობა ქალებისა და გოგონების მიმართ!“ ეს აქცია მთელი მსოფლიოს მასშტაბით იმართება 25 ნოემბრიდან 10 დეკემბრის ჩათვლით.

ღონისძიება ახალციხეში შვეიცარიის განვითარების და თანამშრომლობის სააგენტოს (SDC) ფინანსური მხარდაჭერით გაიმართა. ღონისძიებას ფასილიტაცია ახალციხის გენდერის მედიაცენტრმა გაუწია.



[თამუნა უჩიძე, ახალციხე]