ყველის ფესტივალის გამარჯვებულები სამცხე–ჯავახეთიდან

ყველის საერთაშორისო ფესტივალი "კავკასიური ყველი 2015" თბილისში, რიყის პარკში გაიმართა, სადაც 60–მდე სახეობის ყველი იყო გამოფენილი. ფესტივალში მონაწილეობას იღებდნენ, როგორც ინდივიდუალური მწარმოებლები, ასევე მსხვილი საწარმოები სამცხე-ჯავახეთიდან.

დარგის სპეციალისტებითა და ყველის ტექნოლოგიებით დაკომპლექტებულმა ჟიურიმ 7 ნომინაციაში 12 გამარჯვებული ყველი გამოავლინა. გამარჯვებულთა შორის დასახელდნენ ახალციხელი, ასპინძელი, ახალქალაქელი და ნინოწმინდელი მწარმოებლები.

ჟურნალ „გემრიელი“-ს რჩეულის ტიტული მიიღეს ასპინძიდან მეწარმე ნანი დათაშვილმა და სოფელ ანდრიაწმინდიდან მეწარმე გალინა დიასამიძემ, ყველის უმაღლესი ოსტატის წოდება კი მიენიჭათ ნინოწმინდაში მოქმედ საწარმოებს შპს „მმბ“-ს (მელს ბდოიანი) და შპს „ვან 412“-ს (ვან კაზარიანი). მელს ბდოიანის საწარმომ შპს „მმბ“-მ ასევე ნომინაციაში „ხალხის რჩეული“ - I ადგილი მოიპოვა.

კატეგორიაში „საუკეთესო ევროპული ყველი“ ასევე I ადგილი, ხოლო უმაღლესი ჯილდო - ოქროს მედალი აიღო ნომინაციაში „ტრადიციული კავკასიური ყველი“ შპს. „ვან 412“-მა, მე-3 ადგილზე გავიდა ინდივიდუალური მეწარმე ნანა დათაშვილი ნომინაციაში „საუკეთესო ევროპული ყველი“.

უმაღლესი ჯილდო მოიპოვა "მონასტრის ყველმა" ახალქალაქი-კუმურდოს ეპარქიიდან ნომინაციაში „ყველის მრავალფეროვნება და ინოვაცია“.

გამარჯვებულები სპეციალური დიპლომებითა და მედლებით დააჯილდოვეს.

ყველის მწარმოებელთა გილდიის ინიციატივით, მომავალ წელს ფესტივალის ფარგლებში ღონისძიებები საქართველოს რეგიონებშიც გაიმართება.



[თამარ თოთაძე, ახალციხე]