ხელისუფლება ვარძიაში, ოპოზიცია რუსთავში – სახალხო დღესასწაულის პოლიტიკური ელფერი

გუშინ, 26 სექტემბერს, ვარძიაში „შოთაობა 2015“ იზეიმეს. გასული წლის მსგავსად, სახალხო დღესასწაულს ვარძიაში წელსაც არ დასწრებიან „ერთიანი ნაციონალური მოძრაობის“ წარმომადგენლები. პარტიის რაიონული ორგანიზაციის წევრებმა და აქტივისტებმა „შოთაობა“ სოფელ რუსთავში აღნიშნეს.

ოპოზიცია პროტესტს იმ არგუმენტით ამართლებს, რომ „შოთაობის“ რუსთავიდან ვარძიაში გადატანა პოლიტიკური გადაწყვეტილებაა.
„უკეთესი იქნებოდა თუკი ვარძიობა ვარძიობად, ხოლო შოთაობა შოთაობად დარჩებოდა და ასპინძას შერჩებოდა ეს ორი ტრადიციული დღესასწაული, რომელსაც ყველა აღვნიშნავდით. ორივეს ცალ-ცალკე, თავისი დატვირთვა ექნებოდა, ვარძიობას ისტორული, შოთაობას კი კულტურული. ეს ტრადიცია დაირღვა , მაგრამ ჩვენ ყოველ წელს, როდესაც შოთაობა იქნება, აქ შევიკრიბებით, შოთა რუსთაველის ძეგლთან“, – განაცხადა საპარლამენტო უმცირესობის წევრმა, ასპინძის მაჟორიტარმა დეპუტატმა ტარიელ ლონდარიძემ.

იგი ფიქრობს, რომ რადგან „შოთაობის“ აღდგენა ექსპრეზიდენტ მიხეილ სააკაშვილის მეუღლის, სანდრა რულოვსის სახელს უკავშირდება, ახალმა ხელისუფლებამ ღონისძიების ადგილი ამიტომ შეცვალა.

„ვინც ადგილის შეცვლის გადაწყვეტილება მიიღო, ალბათ კარგი იქნება დაასაბუთოს ადგილის ცვლილების მიზანშეწონილობა. ჩვენ რაიმე არგუმენტები არ მოგვისმენია. არ გაგვიგია, რომ ადგილობრივ თვითმმართველობას ემსჯელა ამ საკითხზე. აქედან გამომდინარე, ჩვენი დამოკიდებულება ნათლად გამოიხატება და ჩვენ არა ვარძიაში, არამედ რუსთავში, შოთა რუსთაველის ძეგლთან აღვნიშნავთ შოთაობის დღესასწაულს“, – ამბობს ტარიელ ლონდარიძე.

„ისტორიულად, „შოთაობა“ პირველად 1966 წელს, სოფელ რუსთავში აღინიშნა, რამდენიმე წელი იყო ვარძიაში, შემდეგ კი რაღაც პერიოდი საერთოდ გააუქმეს. ჩვენ ტრადიციას არ ვარღვევთ“, – ამატებს ასპინძის მუნიციპალიტეტის ყოფილი გამგებელი, „ერთიანი ნაციონალური მოძრაობის“ წევრი ბესიკ ბექაური.



რატომ არ დაესწრო უმცირესობა სახალხო დღესასწაულს – ასპინძის მუნიციპალიტეტის გამგეობაში კითხვაზე პასუხი არ აქვთ.

„მოსაწვევები ჩაბარებული აქვთ“, – ამბობს ასპინძის მუნიციპალიტეტის გამგებლის მოადგილე ალექსანდრე პაპაშვილი.
სოფელ რუსთავის ნაცვლად ვარძიაში „შოთაობა“ 2013 წლიდან აღინიშნება.

„ვარძია ტურისტული ცენტრია, თან ვარძიის კომპლექსი და "ვეფხისტყაოსანიც", ორივე ერთი ეპოქის ძეგლია“, - ასე ახსნეს მაშინ ადგილობრივ თვითმმართველობაში დღესასწაულის ადგილის შეცვლის გადაწყვეტილება.

სწორედ იმ პერიოდიდან, 2013 წლიდან, ვარძიაში გამართული გრანდიოზული ღონისძიების პარალელურად, რუსთავში, მოკრძალებულად აღნიშნავენ „შოთაობას“ „ნაციონალები“.

შეგახსენებთ, დღესასწაულს საფუძველი 1966 წელს ჩაეყარა. მოგვიანებით, რამდენიმე წლის განმავლობაში, დღესასწაულის აღნიშვნა შეწყდა. 2008 წლიდან კი გაზეთ ”ლიტერატურული მესხეთის” გადაწყვეტილებითა და ყოფილი პირველი ლედის, სანდრა რულოვსის პატრონაჟით აღდგა.

[თინათინ ზაზაძე, ასპინძა]