ასპინძამ, შესაძლოა, ‘შოთაობა’ აღარ აღნიშნოს

ასპინძის გამგეობაში განმარტავენ, რომ შოთა რუსთაველისადმი მიძღვნილი ღონისძიებები, მიმდინარე წლის 15 მაისს, კულტურის სამინისტრომ, „ახალციხის ციხეზე“, უკვე გამართა.

„ფაქტობრივად, ‘შოთაობა’ უკვე აღინიშნა და კულტურის სამინისტრომ დაანონსა კიდეც, რომ ყოველ წელს, 15 მაისს ჩატარდება. ერთი და იგივე დღესასაწაულს ორჯერ ხომ არ ჩავატარებთ?!“ – ამბობს ასპინძის მუნიციპალიტეტის გამგებლის მოადგილე ალექსანდრე პაპაშვილი.

გამგეობაში ამბობენ, რომ არ არის გამორციხული სახალხო დღესასწაული მაინც გაიმართოს, თუმცა, მოკრძალებულად.

„ესეთი გრანდიოზული ვერ იქნება, მაგრამ ოქტომბრის ბოლოს, არჩევნების შემდეგ, შევეცდებით მაინც ავღნიშნოთ, ისევ ვარძიაში, რადგან არ დაიკარგოს ტრადიცია“, – ამბობს პაპაშვილი.

კულტურის სამინისტროში განმარტავენ, რომ „ახალციხის ციხეზე“ შოთა რუსთაველისადმი მიძღვნილი ღონისძიებების აღნიშვნა, საქართველოს მთავრობის გადაწყვეტილებაა.

„15 მაისი შოთა რუსთაველის დღედ დაწესდა და ღონისძიებებიც ახალციხეში გაიმართება. კულტურის სამინისტროს არანაირი უფლება არა აქვს ასპინძის გამგეობას უთხრას ჩაატაროს თუ არა ესა თუ ის ღონისძიება. თავიანთი გადასაწყვეტია“, – ამბობენ კულტურისა და ძეგლთა დაცვის სამინისტროში.

ასპინძაში „შოთაობის“ აღნიშვნის ტრადიცია 1966 წელს დამკვიდრდა. 90–იან წლებში სახალხო დღესასწაული აღარ ტარდებოდა. 2008 წლიდან შოთა რუსთაველის იუბილე, ასპინძის გამგეობისა და გაზეთ "ლიტერატურული მესხეთის“ რედაქციის, ასევე საქართველოს ყოფილი პირველი ლედის სანდრა ელისაბედ რულოვსის პატრონაჟით, სოფელ რუსთავის მიმდებარედ, რუსთაველის ძეგლთან იმართებოდა. 2013 წლიდან კი ასპინძის გამგეობის ინიციატივით, სახალხო დღესასწულის აღნიშვნამ რუსთავიდან, ვარძიაში გადაინაცვლა. სახალხო დღესასწაული ასპინძაში ყოველი წლის სექტემბრის ბოლო რიცხვებში ტარდებოდა.

[ლუბა გიორგაძე, ასპინძა]