პროკურატურა ნინოწმინდის გამგეობის თანამშრომლების შესაძლო სამსახურეობრივი გულგრილობის ფაქტებს იძიებს

სამცხე–ჯავახეთის საოლქო პროკურატურაში სისხლის სამართლის საქმეზე იმ მოქალაქეების ნაწილი დაკითხეს, რომლებმაც საქართველოს მთავარ პროკურატურას განცხადებებით მიმართეს. 11 სექტემბერს ჩვენება საზოგადოებარივი მოძრაობა „ახალი რეალობისთვის“ თავმჯდომარემ მერაბ შათირიშვილმა და ნინოწმინდაში მცხოვრებმა ხაჩატურ მარკარიანმა მისცეს.

შათირიშვილმა მთავარ პროკურატურას საჩივრით 23 ივლისს მიმართა, ორი დღით ადრე კი აქ საჩივარი ნინოწმინდაში მცხოვრები 14 მოქალაქის და მათ შორის ხაჩატურ მარკარიანის ხელმოწერითაც შევიდა. აღნიშნული განცხადებები გამოსაძიებლად სამცხე–ჯავახეთის საოლქო პროკურატურას გადაეგზავნა და ძიება სსკ–ის 342–ე მუხლით, 3 სექტემბერს, დაიწყო.

მერაბ შათირიშვილი და ხაჩატურ მარკარიანი აცხადებენ, რომ ნინოწმინდაში რეალურად ტენდერებით ინფრასტრუქტურულ პროექტებზე დიდი ოდენობით თანხა იხარჯება, სამუშაოები კი ბოლომდე არ სრულდება და რაც კეთდება ისიც უხარისხოდ. ამაზე კი ნინოწმინდის მუნიციპალიტეტის გამგებელი გაგიკ კარსლიანი არ რეგირებს. რაც მათ აძლევს იმის ფიქრის საფუძველს, რომ „ამ ყველაფრის უკან თავად გამგებელი დგას“.

„250 ათასი ლარი იყო გამოყოფილი ქალაქში საკანალიზაციო სისტემის მოსაწესრიგებლად, ვითომ გააკეთეს: ფეკალიები ქუჩაშია ამოსული, ჭები ამოწეულია მიწიდან, ყველა მილი დამსკდარია და რაც მთავარია, ეს მილები მიდის ქალაქში მდებარე ტბისკენ“, – ამბობს შათირიშვილი.

მარკარიანის თქმით, კი გარდა საკანალიზაციო სისტემისა ქალაქში ხარვეზებით გაკეთდა ხიდები: „ასევე, უკანონოდაა გაცემული მიწებიც. მაგალითად, გამგებელმა 300 კვადრატული მეტრი მიწა ქალაქის პარკში მოქალაქეზე გააფორმა როგორც სახნავ სათესი ფართობი, რა სახნავ–სათესი უნდა იყოს ქალაქის ცენტრში?! გვინდა, რომ ეს ყველაფერი სამართალდამცავებმა გამოიძიონ“.

გარდა ტენდერებისა, შათირიშვილი გამგებელს ცრუ ინფორმაციის გავრცელებაშიც ადანაშაულებს: „მას შემდეგ რაც ნინოწმინდაში ჩავედი და ამ ტენდერების შედეგები ვნახე, კარსლიანმა ჟურნალისტებთან ისაუბრა იმის შესახებ, რომ თითქოს მე და გია კორკოტაშვილი მას 50 ათას დოლარს ვთხოვდით იმის სანაცვლოდ, რომ ამ ყველაფრის შესახებ მთავრობისა და მედიის ყურამდე ამბავი არ მიგვეტანა“.

შათარიშვილის განცხადებით, თუ ეს მართლა ასე იყო და იგი გამგებელს ფულს სძალავდა, მაშინ თავად კარსლიანს ამის შესახებ სამართალდამცავი ორგანოებისთვის და არა ჟურნალისტებისთვის უნდა გაემჟღავნებინა: „მას თავად უნდა ეთანამშრომლა პროკურატურასთან, მე კი არ უნდა მიმემართა საგამოძიებო ორგანოსთვის, რომ ეს ფაქტი გამოეძიებინათ“.

ნინოწმინდის მუნიციპალიტეტის გამგებელს გაგიკ კარსლიანს „სამხრეთის კარიბჭე“ ვერ დაუკავშირდა, იგი სატელეფონო ზარებს არ პასუხობს. სამცხე–ჯავახეთის საოლქო პროკურატურაში ამბობენ, რომ ძიება სსკ–ის 342–ე მუხლითაა დაწყებული, რაც სამსახურეობრივ გულგრილობას გულისხმობს და რაც შეეხება განცხადებაში მითითებულ სხვა ფაქტებს, თუ გამოძიებისას სხვა დანაშაულიც გამოიკვეთა, ბუნებრივია რეაგირებას მოახდენენ.

[თამუნა უჩიძე, ნინოწმინდა]