ბორჯომის საკრებულოს თავმჯდომარის მანქანის დაწვის საქმეზე დაკითხულს აღკვეთის ღონისძიებად პატიმრობა შეეფარდა

დღეს, 21 აგვისტოს ახალციხის რაიონულ სასამართლოში ბორჯომის მუნიციპალიტეტის საკრებულოს თავმჯდომარის ავტომანქანის დაწვის საქმეზე დაკითხული ვიქტორ მ. – ს სასამართლო პროცესი გაიმართა.

ვიქტორ მ. ერთ–ერთია იმ ოთხ პიროვნებას შორის, რომელებიც აღნიშნულ საქმეზე ბორჯომის პოლიციაში დაკითხეს. მათი დაკითვის დასრულების შემდეგ კი პოლიციაში ვიქტორ მ.–ს მეუღლე დაიბარეს. ბრალდების მხარის ინფორმაციით, მეუღლის დაკითხვას ვიქტორ მ. არ დაასწრეს, რასაც მისი მხრიდან პროტესტი მოჰყვა. როგორც სასამართლო პროცესზე პროკურორმა განაცხადა, ვიქტორ მ. ბორჯომის პოლიციაში ყვირილით შევიდა და პოლიციელებზე ზეწოლა განახორციელა. კერძოდ, პოლიციის ორი თანამშრომელი სცემა და სახის არეში დაზიანებები მიაყენა. გარდა ამისა, მან ერთ–ერთს პოლიციის ფორმა შემოახია.

სასამართლო პროცესზე ბრალდების მხარემ ვიქტორ მ.–სთვის აღკვეთის ღონისძიებად პატიმრობის შეფარდება მოითხოვა იმ მოტოვით, რომ თუ ბრალდებულს სასამართლო გირაოს სანაცვლოდ გაათავისუფლებს, არ არის გამორიცხული, რომ მან პოლიციელებზე ზეწოლა კვლავ განახორციელოს.

ბრალდებულის ადვოკატმა გიორგი ჩიტაძემ კი სასამართლო დარბაზში განაცხადა, რომ ვიქტორ მ.–ს სახლში მეუღლე, 4 თვის შვილი, უმუშევარი დედა და ავადმყოფი ბებია ჰყავს. აღნიშნული გარემოებებიდან გამომდინარე ადვოკატმა სასამართლოს შუამდგომლობით მიმართა და ბრალდებულისთვის გირაოს სახით 3 000 ლარის შეეფარდება მოითხოვა.

თუმცა, სასამართლომ დაცვის მხარის შუამდგომლობა არ გაითვალისწინა და მოსამართლე გიორგი ლონდარიძემ ვიქტორ მ.–ს აღკვეთის ღონისძიებად პატიმრობა შეუფარდა.

გამოძიება სისხლის სამართლის კოდექსის 353 მუხლით მიმდინარეობს, რაც გულისხმობს, პოლიციის მუშაკის ან ხელისუფლების სხვა წარმომადგენლის მიმართ წინააღმდეგობა საზოგადოებრივი წესრიგის დაცვისათვის ხელის შეშლის, მისი საქმიანობის შეწყვეტის ან შეცვლის მიზნით, აგრეთვე აშკარა უკანონო ქმედებისათვის მისი იძულება, ჩადენილი ძალადობით ან ძალადობის მუქარით,- ისჯება ჯარიმით ან თავისუფლების შეზღუდვით ვადით სამ წლამდე ანდა თავისუფლების აღკვეთით ვადით ორიდან ხუთ წლამდე.

ბრალდებულის ადვოკატი მოსამართლის გადაწყვეტილებით უკმაყოფილოა: „გირაოს შეფარდების შემხვევაში ვიქტორ მ. გამოძიებას ხელს არ შეუშლიდა. ასევე შეიძლებოდა, რომ მოსამართლეს მისი წარსული გაეთვალისწინებინა, რადგან იგი ნასამართლევი არაა“.

სასამართლო პროცესს ესწრებოდა ვიქტორ მ.–სთან ერთად დაკითხული ირაკლი კვირკველია, ორგანიზაცია „ფონდი ჩვენი ბორჯომისთვის" წარმომადგენელი. როგორც კვირკველიამ სასამართლო სხდომის დასრულების შემდეგ განაცხადა, ვიქტორ მ. სამართალდაცველებმა სცემეს: „როგორც თვითონ მითხრა, ბორჯომის პოლიციის თანამშრომლებმა ხელზე სიგარეტი ჩააწვეს, ფეხზე და ხელზე ნაიარები აქვს, დაკითხვიდან, რომ გამოვიდა ასე მითხრა, მაგრად მცემესო“.

შეგახსემებთ, რომ 19 აგვისტოს, ღამით, ბორჯომის მუნიციპალიტეტის საკრებულოს თავმჯდომარის ზაზა ჩაჩანიძის „ტოიოტას“ მარკის ავტომანქანა მისივე ეზოში დაიწვა. საქართველოს შინაგან საქმეთა სამინისტროს ინფორმაციით მომხდარზე გამოძიება 188–ე მუხლით დაიწყო, რაც სხვისი ნივთის განზრახ დაზიანებას გულისხმობს. მომხდარზე რამდენიმე მოქალაქე დაკითხეს, მათ შორის ერთ–ერთი ვიქტორ მ., რომელიც მოგვიანებით პოლიციელისთვის წინააღმდეგობის გაწევისა და ფიზიკური შეურაცხყოფის მიყენებისთვის დააკავეს.

[ვარლამ წიკლაური, ახალციხე]