აწყურში ახალგაზრდობის დღე აღნიშნეს

ახალგაზრდობის საერთაშორისო დღესთან დაკავშირებული ღონისძიება ხალციხის მუნიციპალიტეტის გამგეობის მხარდაჭერითა და კულტურის სამსახურის ორგანიზებით გაიმართა. სპორტულ შეჯიბრებებში მონაწილეობას თემის ახალგაზრდები იღებდნენ.

ახალგაზრდები ერთმანეთს სიმღერების, ცეკვებისა და ლექსების ფონზე მკლავჭიდში, ჭიდაობაში, მაგიდის ჩოგბურთში, ჭადრაკში, ნარდში და ასფალტზე ხატვაში შეეჯიბრნენ. დაძაბული შეხვედრების შედეგად გამოვლინდნენ გამარჯვებულები, რომლებიც ფასიანი საჩუქრებით დაჯილდოვდნენ.

12 აგვისტო ახალგაზრდობის საერთაშორისო დღედ 1999 წლიდან აღინიშნება. ამ დღის მიზანია წაახალისოს ახალგაზრდები მთელი მსოფლიოს მასშტაბით, რათა დაგეგმონ და განახორციელონ აქტივობები საზოგადოების ცნობიერების ასამაღლებლად.

ახალციხის მუნიციპალიტეტის გამგეობაში განმარტავენ, ახალგაზრდობის საერთაშორისო დღესთან დაკავშირებით მიძღვნილი ღონისძიებები სისტემურ ხასიათს მიიღებს და მომავალ წლებშიც გაიმართება.

ახალგაზრდობის საერთაშორისო დღე აღნიშნეს ახალციხის ახალგაზრდულ ცენტრშიც. სამოქალაქო განათლების პროგრამის „მომავლის თაობა“ ფარგლებში, ახალციხის მუნიციპალიტეტის სოფლებიდან მოწვეულ ახალგაზრდებს, ტრენინგ-შეხვედრა მეექვსე საჯარო სკოლის პედაგოგმა, ტრენერმა თამარ ჩაფიჩაძემ ჩაუტარა.


[sknews.ge]