სხვილისელები სოფლიდან „ჯეოსელის“ ანძის გატანას ითხოვენ

ახალციხის მუნიციპალიტეტის სოფელ სხვილისში ადგილობრივმა თვითმმართველობამ 10–წლიანი იჯარით გადასცა „ჯეოსელს“ ის ტერიტორია, რომელზეც წლებია კომპანიას ანძა უდგას. 70 კვ.მეტრზე „ჯეოსელი“ თვეში 207 ლარს გადაიხდის. ამის შესახებ ახალციხის მუნიციპალიტეტის საკრებულომ 16 ივლისს იმსჯელა. აღნიშნულ ინიციატივას მხარი არ დაუჭირა ორმა დეპუტატმა. მათ შორის ერთ–ერთი ახალციხის მუნიციპალიტეტის საკრებულოს წევრი სხვილისის მაჟორიტარული ოლქიდან არუთუნ აგაბაბიანი იყო.

მისი თქმით ანძის მიმდებარე ტერიტორიაზე მცხოვრები მოსახლეობა გენერატორის ხმით შეწუხებულია და მის გადატანას სხვა ტერიტორიაზე ითხოვს: „შუქი, რომ ითიშება საშინელი ხმა აქვს“.

„წლებია მანდ ანტენა დგას და როდესაც ფულის გადახდაზე მიდგა საქმე, ახლა აღარ გვინდა? – კითხულობს ახალციხის მუნიციპალიტეტის გამგებელი ზაზა მელიქიძე და ამატებს – შეგვიძლია „ჯეოსელს“ ვთხოვოთ, რომ გენერატორი ხმის ჩამხშობით შეფუთონ“.

ზაზა მელიქიძის განმარტებით შესაძლოა გენერატორი სკოლის ძველი შენობის სარდაფში გადაიტანონ და მოსახლეობას ხმაური აღარ შეაწუხებს: „წერილი გავგზავნეთ ეკონომიკის სამინისტროში და შენობის გადმოცემა ვთხოვეთ. სავარაუდოდ, ჩვენ თხოვნას დააკმაყოფილებენ. სკოლის ყოფილ შენობაში ახალგაზრდული ცენტრის მოწყობა გვინდა, სარდაფში კი გენერატორს დავდგამთ“.

კომპანია „ჯეოსელში“ განმარტავენ, რომ სხვილისის ცენტრიდან გენერატორის აღებას გეგმავენ, რაც შეეხება ანძას ის იგივე ადგილზე დარჩება.
„ანძა, მისი მნიშვნელობიდან გამომდინარე, ადგილზე დარჩება. საბაზო სადგურის ფუნქციონირების მიზანი ქსელის დაფარვის ხარისხისა და ინტერნეტის სიჩქარის გაუმჯობესებაა. ნებისმიერი საბაზო სადგურის მონტაჟი ხორციელდება ყველა სანიტარული ნორმისა და წესების დაცვით, რაზეც შესაბამისი ინსტანციების მიერ წინასწარ გაცემულია დოკუმენტები“, – განმარტავენ „ჯეოსელში“.

[თინათინ ზაზაძე, ახალციხე]