სოფელ აგარაში მაღაზია გაქურდეს

სოფელ აგარის ცენტრში მდებარე მაღაზია გამთენიისას გატეხილი ამავე სოფელში მცხოვრებმა ბადრი მელიქიძემ ნახა.

„დილით ადრე სათიბად მივდიოდი, რომ დავინახე მაღაზიის კარზე მინა ჩამსხვრეული იყო, გატეხილი იყო ჟალუზი და ბოქლომიც“, – ამბობს მელიქიძე და ამატებს, რომ მაშინვე მაღაზიის პატრონთან ვახტანგ ინდუაშვილთან, ასევე, გამყიდველთან მანანა ხაბელაშვილთან დარეკა.

მომხდარზე, არ საუბრობს ინდუაშვილი: „ყველაფერი პოლიციას გადავეცი“.

მანანა ხაბელაშვილი კი ამბობს, რომ მაღაზიიდან სიგარეტი, ალკოჰოლური სასმელები, შოკოლადი, ტელევიზორი და ფული წაიღეს.

„დაახლოებით 1000 ლარის ღირებულების საქონელი გაიტანეს, მხოლოდ სიგარეტები 570 ლარისაა გატანილი, ასევე, ფული 70 ლარი წაღეს“, – ამბობს ხაბელაშვილი.

ქურდობა აგარაში 16 ივლისს ღამით მოხდა, ძიება მომხდარზე ამავე დღეს ახალციხის რაიონულმა სამმართველომ 177–ემუხლის ა და ბ ქვე პუნქტებით დაიწყო, რაც ქურდობას სადგომში ან სხვა საცავში უკანონო შეღწევით გულისხმობს.

[თამუნა უჩიძე, ახალციხე]